Бэрдьигэстээххэ ууну ыраастыыр ыстаансыйа тутуллар

«Олорор дьиэ-уот уонна куорат эйгэтэ» национальнай бырайыак «Ыраас уу» федеральнай бырагырааматын чэрчитинэн Горнай улууһун Бэрдьигэстээх нэһилиэгин уунан хааччыйыы ыстаансыйата тутуллар турар.

Бүгүҥҥү туругунан бэдэрээтчит тэрилтэ «Капитал-М» ХЭУо тутууну ыытар уонна гаас хочуолунайыгар таҥар үлэни ыытар диэн Горнай улууһун дьаһалтатын пресс-сулууспата иһитиннэрэр.

Эбийиэк тутуутун түмүктүүргэ наадалаах тутуу матырыйааллара учаастакка тиэрдилиннилэр. Тутуу бэлэмэ 80% кэриҥэ. Эбийиэги үлэҕэ киллэрии болдьоҕо 2024 сыл ахсынньы 1 күнүгэр диэри.

Бэрдьигэстээх нэһилиэгэр күҥҥэ 500 кубометр кыамталаах ыраастыыр ыстаансыйаттан бастакы түһүмэххэ уу «38-с кыбаарталга» хочуолунайыгар тиийиэ, Березовай уонна Дьячковскай уулуссаларыгар баар элбэх кыбартыыралаах дьиэлэри уунан хааччыйыа.

Бу бырайыак олоххо киириитэ Бэрдьигэстээх нэһилиэгин тохтоло суох уонна үрдүк хаачыстыбалаах кииннэммит уу ситиминэн хааччыйыаҕа.