Бэрдьигэстээххэ Ыччат сыла арылынна

Бэҕэһээ, тохсунньу 23 күнүгэр, Горнай улууһун Бэрдьигэстээх сэлиэнньэтигэр Мэхээлэ Дьөгүөрэп аатынан сынньалаҥ киинигэр нэһилиэккэ биллэриллибит Ыччат сылын арыйыы тэрээһинэ буолла.

Бу туһунан Бэрдьигэстээх нэһилиэгин ыччакка, культураҕа, успуорка ааҕыныстыбатын исписэлииһэ Роман Дмитриев сырдатта:

— Үөрүүлээх киэһэ, нэһилиэк баһылыга Алексей Аргунов эҕэрдэтиттэн саҕаланна.

Бу сыл устата Бэрдьигэстээх ыччаттарыгар ураты болҕомто ууруллара былааннанар. Ол курдук, тэрилтэлэр икки ардыларыгар «Сэргэх сэлиэнньэ» комплекснай күрэс буолуоҕа.

 Ыччат сыла «Икки сулус» бырайыагынан арылынна. Маны тэҥэ, ыччаттар «Берд Saas», «Сайдыы», «Чыпчаал», «Ыччат’s». Хамаандаларга кыттыһан бэйэлэрин кыахтарын билиһиннэрдилэр.

Бу хамаандаларга үлэлэрин хайысхатынан көрөн, сыл түмүгүнэн кыайыылаахха 100 тыһ. солк., 2 миэстэҕэ — 80 тыһ. солк. 3 миэстэҕэ —  60 тыһ. солк., 4 миэстэҕэ — 20 тыһ. солк. бэриллиэҕэ. Бу курдук «Сэргэх сэлиэнньэ» сэргэх ыччата, саҥа сылы сонун сүүрээнинэн көрүстэ. Уоттаах-күөстээх киэһэни Дьокуускай куораттан «Арчы» бөлөх кэлэн киэргэттэ.