Бэрдьигэстээххэ «Үрдэл» түөлбэ ГТО-ҕа дьиэ кэргэн күрэхтэһиитин тэрийдэ

Горнай улууһун баһылыгын гранын ылбыт түөлбэлэр бу күннэргэ бэйэлэрин бырайыактарын көхтөөхтүк үлэҕэ киллэрэн эрэллэр. 

Биир оннук бырайыак —  дьиэ кэргэнинэн ГТО көрүҥнэригэр күрэхтэһии дьон-сэргэ болҕомтотун тарта. Бу туһунан Бэрдьигэстээх сэлиэнньэтин  баһылыгын солбуйааччы Ксения Васильева маннык иһитиннэрдэ:

— Светлана Лю-фа салайааччылаах «Үрдэл» ТОС «Дьиэ кэргэнинэн — ГТО-ҕа» диэн улуус баһылыгын 50 тыһыынча солкуобай гранын ылбыт бырайыагын олоххо киллэрдэ.  Дьиэ кэргэн уонна Оҕо саас сылларыгар анаммыт улуус таһымнаах күрэхтэһиигэ түөрт дьиэ кэргэн: Бэрдьигэстээхтэн — Алексеевтар, Парфеновтар, Макеевтар уонна Орто-Суртан Вензеллэр кыттыыны ыллылар. Кыттааччылар уопсайа түөрт көрүҥҥэ, «иннигэр умса түһүүгэ», «миэстэттэн ыстаныыга», «граната быраҕыытыгар» уонна «эстафетаҕа» ийэ, аҕа, оҕо, эбээ, эһээ буолан күрэхтэстилэр. Маҥнайгы көрүҥҥэ «иннигэр умса түһүүгэ» Макеевтар уопсайа 102 см таарыйан бастаатылар, иккискэ — Алексеевтар, 85 см. таарыйдылар, үһүскэ Парфеновтар — 83 см. төрдүс — Вензеллэр 56 см. Онтон «миэстэттэн ыстаныы»көрүҥҥэ  Макеевтар 6 м 75 см ыстанан эмиэ инники күөҥҥэ таҕыстылар, иккис — Парфеновтар 6 м 73 см, үһүскэ — Вензеллэр 6 м 18 см, төрдүскэ — Алексеевтар 5 м 98 см. «Граната быраҕыытыгар» Парфеновтар 73 м 80 см ырааҕы быраҕан бастаатылар, иккис — Макеевтар 63 м 70 см,  үһүс — Вензеллэр 56 м 70 см,  төрдүс — Алексеевтар 55 м. 40 см. бырахтылар. Түмүктүүр түһүмэххэ – эстэпиэтэҕэ дьиэ кэргэттэр 250 м. уһуҥҥа илин-кэлин түһүстүлэр. Эстэпиэтэҕэ  Вензеллэр бастаатылар, иккискэ — Макеевтар, үһүскэ — Парфеновтар, төрдүскэ — Алексеевтар буоллулар. Күрэхтэһии түмүгүнэн Александр, Любомира Макеевтар, кыыстара Каролина, эбэлэрэ Надежда 1-кы миэстэни ыллылар.  2-с миэстэҕэ Николай, Екатерина Парфеновтар кыыстара Сандаара, эбээлэрэ Жанна тигистилэр. 3-с миэстэ — Алексей, Ксения Вензеллэр уолларын Авдейы, эһээлэрин Анатолийы кытта буоллулар. Оттон көхтөөх  Никита, Надежда Алексеевтар кыыстара Галя, эбээлэрэ Софья бырайыакка кыттыыларын туһунан Туоһу суругунан, анал бириистэринэн наҕараадаланнылар.

Ити курдук, Горнай улууһун көхтөөх түөлбэлэрэ улуус баһылыгыттан ылбыт граннарын бэрт айымньылаахтык уонна ситиһиилээхтик олоххо киллэрэн эрэллэр.