Бэрдьигэстээхтэр алаадьы 95 көрүҥүн амсайдылар

Бу күннэргэ Саха сирин улуустарыгар Төрөөбүт тыл уонна сурук-бичик күнүгэр анаммыт тэрээһиннэр салҕаналлар.

Биир олус сэргэх тэрээһин туһунан Горнай улууһун Бэрдьигэстээх сэлиэнньэтин Мэхээлэ Дьөгүөрэп аатынан Сынньалаҥ киинин уус-уран салайааччыта Агафия Ефремова сырдатар:

 — Мэхээлэ Дьөгүөрэп аатынан сынньалаҥ киинигэр Төрөөбүт тыл уонна сурук-бичик күнүгэр анаммыт “ҺӨҔҮҤ” СахаФест тэрээһинигэр оҕо-аймах, дьон-сэргэ тоҕуоруһа мустубута, бу күн суолтатын өссө үрдэттэ. Тэрээһини сэргээн көрө-истэ кэлбит хас биирдии кыттааччыны “Сарыада” хомусчуттар ансаамбылларын бөлөҕө киирии аантан хомус дьүрүскэн дорҕоонунан көрсүбүттэрэ, тута сахалыы тыыммытын уһугуннарда.  “ҺӨҔҮҤ” сахафест тэрээһин алгысчыт Тамара Ефремова боҕоруоскай оту уматан, сыт таһааран арчылааһыныттан саҕаланна.

Бу бэлиэ күҥҥэ анаан тэриллибит улууспут 95 сылыгар – саха маанылаах аһа алаадьы 95 араас көрүҥүн быыстапкатын кэлбит эрэ киһи чахчы сөҕүөн сөхтө. Бэрдьигэстээх  далбар хотуттара астаабыт амтаннаах алаадьыларын 95 көрүҥэ тардыллыбыта, ону тэҥэ дыргыл сыта сүрэҕи-быары сылаанньытта.

Тэрийээччилэр быыстапка түмүгэр бары ыалдьыттары алаадьы арааһынан айах тутан күндүлээтилэр. Тэрээһин кыттыылаахтара, ордук оҕо-аймах бу кэрэ көстүүнү сөҕө махтайа көрдүлэр-иһиттилэр, ону сэргэ тала сылдьан амсайдылар.

Тэрээһин кыттыылаахтарын Бэрдьигэстээх нэһилиэгин баһылыга А.Г. Аргунов эҕэрдэлээтэ уонна ыччат  сахатын тылын сүтэрбэккэ, сайыннара  турарыгар эттэ. Салгыы Бэрдьигэстээх оскуолаларын 6-7 кылааһын үөрэнээччилэрин икки ардыларыгар “Тыл хонуута” оонньуу тэрилиннэ. Оҕолор хамаанданан түргэн ыйытыкка, элбэх сахалыы тылы суруйууга, бэриллибит бириэмэҕэ «ҺӨҔҮҤ» тыл дорҕооннорунан сахалыы тыллары таһаара оонньоотулар. Сорох түгэҥҥэ сымсатык туттан, сорох түгэҥҥэ ыарырҕатан да ыллаллар, оҕолор үөрэ-көтө күрэстэстилэр. Бу оонньууга ким түргэн туттуулаах, мындыр толкуйдаах, сахалыы саҥалаах илин-кэлин түһүстүлэр. Түмүккэ, А.Н.Осипов аатынан Бэрдьигэстээх орто оскуолатын 6-с кылааһын үөрэнээччилэрэ (кылаас салайааччыта Е.Е. Антонова) бастыҥынан ааттаннылар, иккис – В.В. Филиппов аатынан Бэрдьигэстээх улуустааҕы гимназиятын 7 кылааһын үөрэнээччилэрэ (кылаас салайааччыта Л.С.Петрова), үһүс – С.П. Данилов аатынан Бэрдьигэстээх орто оскуолатын 6-с кылааһын үөрэнээччилэрэ (кылаас салайааччыта С.К. Заровняева) буоллулар. Бары кыттааччылары тэрийээччилэр минньигэс аһынан күндүлээтилэр.

“ҺӨҔҮҤ” сахафест тэрээһин түмүктүүр тэрээһининэн Ульяна Бурнашева суруйуутугар «Кустук өҥнөөх кулуунчук» оҕолорго аналлаах олоҥхотун С.П.Данилов аатынан Бэрдьигэстээх орто оскуолатын 3 “Б” кылааһын үөрэнээччилэрин (кылаас салайааччыта Алена  Никифорова) туруоруута буолла. Кырачаан артыыстар бииртэн биир ураты сонун көстүүлэри, олоҥхо тылынан, ону сэргэ үҥкүүлээн, хамсанан-имсэнэн, айымньы ис хоһоонун көрөөччүгэ итэҕэтиилээхтик тиэртилэр. Ураты көстүүнү уот-күөс киэргэтэн, экраҥҥа айылҕа уларыйыыта ойуулук көстүүтүнэн киллэриллэн, өссө ситэрэн биэрдэ. Олоҥхону туруорда эдэр режиссер В.Г.Саввина. Олоҥхо күргүөм оһуохайынан түмүктэннэ. Онон бу күн “ҺӨҔҮҤ” СахаФест тэрээһиҥҥэ кыттыбыт, сылдьыбыт эрэ киһи барыта чахчы һөҕөн, сэргээн ааста.