Бэрдьигэстээхтэр уопсастыбаннай сирдэрин хаарын ыраастаатылар

Бэҕэһээ, сэтинньи 1 күнүгэр, Норуот сомоҕолоһуутун күнүн көрсө Бэрдьигэстээх сэлиэнньэтин болуоссаттарыгар субуотунньук ыытылынна. 

Ол курдук, олохтоохтор үлэ чааһын кэнниттэн киэһэ кэлэн, Сэмэн уонна Софрон Даниловтар пааркаларын, «Мин Горнайбын таптыыбын», Маатта үрэх кытылын искибиэрдэрин, сынньалаҥ пааркатыгар барар муоста хаарын ыраастаатылар.

Видео — Бэрдьигэстээх дьаһалтатын телеграм ханаалыттан.

Бэрдьигэстээх нэһилиэгин дьаһалтатын, Мэхээлэ Дьөгүөрэп аатынан сынньалаҥ киинин, Ыччат бэлиитикэтин, култуура уонна спорт ааҕыныстыбатын исписэлиистэрэ  уонна Сэргэлээх түөлбэ олохтоохторо эдэрдиин-эмэнниин  тахсан үлэни үмүрүттүлэр.

«Ол эрээри эрдэттэн ыҥырыы барбытын үрдүнэн, элбэх киһи кэлбэтэ.  Сэлиэнньэбит тупсаҕай буолара — барыбыт күүһүгэр», — диэн суруйар Бэрдьигэстээх сэлиэнньэтин дьаһалтатын телеграм-ханаала.

… Бу күннэргэ хаар хойуутук түһэн, үгүс нэһилиэктэр паамытынньыктара хаарынан бүрүллүбүттэрэ чахчы. Онон бэрдьигэстээхтэр холобурдарын батыһан, нэһилиэги тупсарыы үлэтэ барара хайаан да наада.