«Бөрө үүтээнигэр» туризм тула соргулаах соруктар турдулар

Аҕыйах сыллааҕыта туризмҥа кэлиэҥ диэбиттэрэ буоллар, ол саҕана култуура киһитэ «диэ» диэн саҥа аллайыам эбитэ буолуо…

Сунтаарга Наахараҕа «БӨРӨ ҮҮТЭЭНИН» салайааччыта Татьяна Васильева эдэркээн ийэ олус тэрээһиннээхтик барыбытын сынньанар түһүлгэтигэр түмэ тардан кэскиллээх кэпсэтиини олохтоотубут. Улууспут сынньанар дьиэлэрин салайааччылара үгүспүт кэлэн (Тойбохойтон «Хорс Кемпинг», Тэҥкэттэн «Абааһы балаҕана», Кириэстээхтэн «Сыдьаайа балаҕана», Сунтаартан «Таптал» афрейм уонна саҥа саҕалааччылар, бу эйгэҕэ саҥаны арыйыан баҕалаахтар) арааһы анааран кэпсэттибит, холобурдарбытын үллэһиннибит, инникигэ бииргэ үлэлиир торумнары быһаарыстыбыт. Көрсүһүүгэ Сунтаарбыт туризмын сайдыытыгар быһаччы сыһыаннаах Борис Васильев, Александра Иванова уонна тыа хаһаайыстыбатын үлэһитэ Анжелика Николаева биһиэхэ сүүтүк сүбэлэри, туох-ханнык тосхоллорго, барылларга кыттыахпытын сөбүн кэпсээтилэр. Маны таһынан ВКС нөҥүө СӨ туризмын сайыннарыы агенствотыттан Аркадий Ксенофонтов бэйэтинэн тахсан олус элбэх сүбэни биэрдэ.

Күн түмүгүнэн иккис көрсүһүүгэ Арҕаа эҥэр түөлбэтин улуустара Сунтаар, Ньурба, Мииринэй, Лиэнскэй туризмын сайдыытыгар сүрүн болҕомтону ууруохха дэстибит. Ону кытта Сунтаарга кэлэр-барар ыалдьыттары көрсүүгэ, атаарыыга биир ситиминэн үлэлээн туристическай маршруттары тэрийиэххэ, улуус дьаһалтатын көмөтүнэн хас биирдии сынньанар дьиэ, түһүлгэ визитка видео бэлэмнээн таһаарыыга, «Яндекс», «2 ГИС» сыһыарыыларга аадырыстарбытын киллэрии үлэлэрин ыытыахха диэн сүбэлэһэн тарҕастыбыт.

ТУСКУЛААНА ГОРОХОВА-КОБЕЛЬЯНОВА