Бэрэбиэркэ Нерюнгритааҕы көтөр фабрикатын бородууксуйатыгар сальмонелла баарын бигэргэттэ

Нерюнгри куоракка ыытыллыбыт Олоҥхо ыһыаҕын кэнниттэн Нерюнгритааҕы көтөр фабрикатын бородууксуйатыгар сальмонелланы бэрэбиэркэлээһин буолан ааста.

Нерюнгри оройуонугар Олоҥхо ыһыаҕа түмүктэнээтин кытта, сорох дьон суолталаах тэрээһинтэн айаннаан иһэн, үгүстэр сарсыҥҥы күнүгэр сүһүрэн ыалдьыбыттара. Ыалдьыбыт дьон тута Таатта улууһун Ытык Күөллээҕи киин балыыһатыгар уонна Дьокуускай куораттааҕы инфекционнай балыыһаҕа киирбиттэрэ.

“Нерюнгри оройуонугар  Олоҥхо ыһыаҕын бэлиэтээһин кэмигэр өрөспүүбүлүкэ алта улууһугар 92 киһи сальмонеллеһынан ыарыйда. Сальмонеллез диагноһа лабораторнай анаалыстарынан бигэргэтиллибитэ. Ыарыы бары түбэлтэлэрэ Нерюнгрига куурусса этиттэн оҥоһуллубут  бэлэм аһылык технологиятын кэһиини кытта сибээстээхтэр. Бу маннык түмүгү Эпидемиология киин института оҥорбута. Борокуратуура хонтуруоллуур-кэтээн көрөр тэрээһини ыытта. Ол кэмҥэ лабораторияҕа бородууксуйаҕа сальмонеллез патогеннара эмиэ булулуннулар. Сүһүрүү ыарыытын көбүппүт вирус куурусса этигэр уонна онтон оҥоһуллубут бородууксуйаҕа баара биллибитэ. Манна  санитарнай сокуон ирдэбиллэрин кэһии баара бэлиэтэммитэ.  Матырыйаал оҥоһуллан,  суукка бэрилиннэ», — диэн Саха сирин Роспотребнадзора ЯСИА-ҕа иһитиннэрдэ.

Бу күннэргэ Олоҥхо ыһыаҕар сылдьан Нерюнгритээҕи көтөр фабрикатын бородууксуйатыттан оҥоһуллубут астан сүһүрбүт дьон түмсэн, социальнай ситимҥэ анал бөлөх тэриннилэр. Кинилэр истэригэр суруналыыстар, култуура үлэһиттэрэ, артыыстар, суруйааччылар, спортивнай суудьуйалар, спортсменнар бааллар. Сүһүрүү түмүгэр дьон доруобуйата улаханнык эмсэҕэлээтэ. Сорохтор  билигин да үтүөрэ иликтэр, эмтэнэ сылдьаллар. Онон буруйдаахтар хайаан да сэмэҕэ тиксэллэрэ, моральнай хоромньуну толуйаллара наада диэн эмсэҕэлээбит дьон анаан сомоҕолоһон, бэйэлэрин бырааптарын көмүскүүргэ сананан, туһанааччылар интэриэстэрин көмүскүүр докумуоннары бэлэмнээн эрэллэр.