“Берегиня” оҕо дьиэтигэр сырыттыбыт

Ахсынньы аам-даам тымныытын билиммэккэ, эмиэ айаҥҥа туруннубут. Бу сырыыга массыынабыт багажнигар көннөрү бакыаттар буолбакка, кимнээх эрэ кыракый баҕа санаалара бааллар.

Бу аата биһиги “Берегиня” оҕо дьиэтигэр баран иһэбит, биллэн турар, долгуйабыт. Киирээт да,  биһигини сэргии көрбүт харахтары көрө түспүппүт. Олорго харыйа уоттарын сэргэ эрэл-итэҕэл уоттара сандаараллара.

Оҕолору кытта оонньоон-көрүлээн баран, бэлэхтэрбитин туттарбыппыт. Ол гынан баран саамай киһини уйадытар түгэнинэн бэлэх туттарыыта буолбакка, кыракый Артем кэлэн биһигини күүтүөҕүн, аныгыскыга үҥкүүлүүрүн көрдөрүөҕүн уонна оонньуон баҕарарын туһунан эппитэ буолар.

Маннык түгэннэргэ дьикти диэн бэлэх да, ап да буолбатаҕын, хоруопкаҕа кыайан сууламмат киһи киһиэхэ болҕомтото буоларын, ис сүрэххиттэн өйдүүгүн.

Биһиги уулуссаҕа банаар уоттара хайыы-үйэ тыкпыт кэмнэригэр тахсыбыппыт. Массыынаҕа маарыҥҥы күө-дьаа суоҕа. Бэлэх туттарыы диэн төрүөт эрэ буоллаҕа, биһиги кинилэргэ бэрт кыра илгэлээх сылаас сыһыаны аҕаллахпыт, ол оннугар кинилэртэн киһи буолар диэн хайдах курдук суолталааҕын өйдөтөр туох эрэ быдан улаханы ылан бардахпыт.

Пригороднай бөһүөлэгин дьахталларын сэбиэтин аатыттан “Сахаада” канцтабаар маҕаһыын кэлэктиибигэр  ИП Виктор Стручковка куруук көмө-ама буолалларын иһин махталбытын тиэрдэбит.

Чэмэлиинэ Скрябина.