С.Слепцова уонна, ааптар
Бүгүн СӨ Тыа хаһаайыстыбатын уонна аска-үөлгэ бэлиитикэтин министиэристибэтин саалатыгар Булчут күнүн чэрчитинэн, бөрөһүт-булчуттар сэминээр-мунньахтара ыытылынна.
Мунньаҕы киирии тылынан СӨ Экологияҕа, айылҕаны туһаныыга уонна ойуур хаһаайыстыбатыгар миниистири солбуйааччы Николай Додохов арыйда. Кини киирии тылыгар бөрө тириитин туттарыыга кыһалҕалар баалларын бэлиэтээтэ. Тыа хаһаайыстыбатын министиэристибэтиттэн Хоту дойду үгэс буолбут салааларын уонна балык хаһаайыстыбатын комплексын сайыннарыыга отделын салайааччыта Иннокентий Баланов бөрөһүттэр тыа хаһаайыстыбатын салаатыгар көмөлөрүн иһин махтанна.
Булт департаменын кылаабынай исписэлииһэ Артур Дмитриев бөрө тириитин туттарыыга ирдэнэр докумуоннар тустарынан быһаарда. Манна толоруллубут аактаҕа илии баттааһыннарга болҕойорго эттэ. Холобура, булчут, улуустааҕы иниспиэксийэ эбэтэр судаарыстыбаннай иниспиэктэр, оройуон бэрэстэбиитэлэ, нэһилиэк баһылыга илии баттыахтаахтар, нэһилиэк тыа хаһаайыстыбатын исписэлииһэ эмиэ илии баттыан сөп. Манна даҕатан эттэххэ, 2024 сыл бастакы кыбаарталыгар туттарбыт тириилэрин харчытын муус устар-ыам ыйдарыгар ылыахтара. Быһата, туттарбыт кыбаарталыҥ кэнниттэн кэлэр кыбаарталга төлөбүргүн ылар эбиккин.
Ханнык хапкаан ордугуй?
Булчуттар туруорсууларынан бу адьырҕа кыылга лиссиэнсийэ болдьоҕун уһатар боппуруоһу дойду Бырабыыталыстыбатын Бэрэссэдээтэлэ Михаил Мишустиҥҥа тиийэ туруорсан, араас инстанцияларга сурук ыыталаабыттар. Биология ресурсаларын департаменыттан Иннокентий Слепцов бөрө ахсаанын сүрүннээһиҥҥэ үлэ күүскэ тэриллэрин туһунан эттэ. Ол курдук, өрөспүүбүлүкэҕэ 35 идэтийбит биригээдэни тэрийбиттэрэ төһүү буолбут. Маны таһынан бу үлэҕэ кэтээн көрүүнү (мониторинг) ыытыы улахан суолталаах буолуоҕа. Ол туһунан кылаабынай исписэлиис Иннокентий Винокуров билиһиннэрдэ. Булчуттар анкетаны көмпүүтэргэ толоруохтаахтар. Дьокуускайтан булчут Вадим Николин аҕам саастаах булчуттарга бу эрэйдээх соҕуһун бэлиэтээтэ. Онон бу процедураны судургу гынарга туруоруста.
Учуоту ыытыы бүддьүөт үбүн туруорсарга эмиэ наадалааҕын Айылҕа ураты харыстанар сирдэрин уонна айылҕа паркаларын Биология ресурсаларын департаменын дириэктэрин солбуйааччы, бу тэрээһини салайан ыыппыт Иннокентий Семенов чопчулаата.
Сэминээргэ үгэс курдук, уопут атастаһыыта буолла. Бу да сырыыга бэһис төгүлүн тэриллибит сэминээргэ Дьокуускайтан Вадим Николин салайааччылаах биригээдэ хапкаан, туһах ханнык көрүҥнэрэ ордуктарын туһунан быһаччы көрдөрөн кэпсээбиттэрэ болҕомтону тарта. Вадим Георгиевич “Орто Ураллааҕы собуот” оҥорон таһаарбыт тэриллэрин хайҕаата.
Туһааннаах департамент 2022 с. саайтын үлэлэппитэ. Бу саайтка “Учетные работы” диэн саҥа салааны оҥорон, тупсаран биэрдилэр. Манна бөрө, хагдаҥ эһэ, кустар, мас көтөрдөрүн тустарынан анкета-ыйытык толоруохтаахтар.
Ахсынньы 24 күнүгэр «Бриллианты Якутии» ансаамбыл 2025 сылы түмүктүүр аһаҕас уруогун үрдүк таһымнаахтык ыытта! [gallery…
Үөрэх тиһигин оптимизацията үөрэх хаамыытыгар хоромньуну оҥоруо суохтаах. Бу туһунан өрөспүүбүлүкэ баһылыга Айсен Николаев Ил…
Социальнай пуонда Саха сирнээҕи салаата иһитиннэрэринэн, биэнсийэни уонна оҕо босуобуйаларын Саҥа дьыл иннинэ эрдэ биэриэхтэрэ. …
Ю.П. Степанов аатынан инбэлииттэри чөлүгэр түһэрэр өрөспүүбүлүкэтээҕи кииҥҥэ 557 байыаннай дьайыы кыттыылааҕа уонна кинилэр дьиэ…
Аны сайын Кэбээйи улууһугар Олоҥхо ыһыаҕа ыытыллар. Ону көрсө Сииттэ оскуолатын таһыгар төрөппүттэр оҕолорун кытта…
Абый улууһун борокуруора оскуолаҕа уруокка эт-хаан эчэйиитин ылбыт оҕоҕо харчынан толуйууну төлөттө. 2014 сыллаахха төрөөбүт…