Бөрөлөөххө оҕуруот аһа тиийдэ

Аллайыаха улууһун саамай кытыы, ыраах сытар нэһилиэгэр Бөрөлөөххө оҕуруот аһа тиэрдилиннэ. 

Аллайыаха улууһун Бөрөлөөх нэһилиэгиттэн үөрүүлээх сонун кэллэ. Ол курдук, бэҕэһээ Чокуурдаахтан бөртөлүөтүнэн  сибиэһэй оҕуруот аһа тиийбит.

Онон хортуоппуй, хаппыыста, моркуоп, луук , сүбүөкүлэ тиийэн, олохтоохтор үөрүүлэрэ муҥура суох. Бу оҕуруот аһын “Якутоптторг” тэрилтэ Чокуурдаахха баар ыскылаатыттан тиэрдибиттэрэ.

— Тиийбит оҕуруот аһын П.Рожина олохтоохторго атыылыаҕа. Барыларыгар тиийэр гына сакаастаабыппыт. Уопсайа 2 т  100 киилэ, — диир нэһилиэк саҥа талыллыбыт баһылыга Егор Николаевич Рожин. 

Хаартыска: Бөрөлөөх нэһилиэгин дьаһалтатыттан