Бөрөлөөхтөр оҥочолорун соһон айанныыллар

Ыраах сытар Аллайыаха улууһун Бөрөлөөх олохтоохторо айаҥҥа үгүс күчүмэҕэйдэри көрсөллөр. Сайыҥҥы кэмҥэ улуус киинигэр Чокуурдаахха диэри мотуорунан сылдьаллар.

— Быйыл өрүскэ уу түһэн, 480 км уу айанын суолун сорҕотугар мотуордаах оҥочону соһон айанныыллар. Онон дьон олус сыраны көрүстүлэр. Аны билигин Чокуурдаах диэки өттүгэр Бойдомҥо уу күүскэ түһэн, онно эмиэ сосуһуулаах буолла. Сорох дьон аара хоно-хоно айанныыллар. Айанньыттар этэллэринэн, билигин киһи тапочканан сылдьыан сөптөөх гына түспүт сирдэр бааллар үһү, — диэн иһитиннэрдэ Бөрөлөөхтөн Надежда Дьяконова.