Бэрэсидьиэммит ыытар бэлиитикэтин өйдүүбүт, өйүүбүт

«Бары түмсэн, үчүгэйи санаан, кэскили тутуһан бардахпытына олохпут этэҥҥэ буолуо», диир Вильям Иванов. Кини Арассыыйа күнүн көрсө санаатын үллэһиннэ.

Вильям Иванов, СӨ сэрии, үлэ, сэбилэниилээх күүстэр уонна быраабы араҥаччылыыр уорганнар бэтэрээннэрин уопсастыбаннай тэрилтэлэрин бэрэссэдээтэлэ:

— Соторутааҕыта Кыайыы 80 сылын бэлиэтээбиппит. Дойдубут Төрүт сокуонунан Арассыыйа ССРС салҕааччыта буоларын быһыытынан, оччотооҕу дойдубут кыайыыларын, ситиһиилэрин барытын чиэстээхтик өрө тутан илдьэ иһэр. Бары бэрэсидьиэммит Владимир Путин ыытар бэлиитикэтин өйдүүбүт, өйүүбүт. Бары түмсэн, үчүгэйи санаан, кэскили тутуһан бардахпытына олохпут этэҥҥэ буолуо. Сүрүнэ, биир сомоҕо буолан, биир санаанан өйөөтөхпүтүнэ, бу иирсээҥҥэ кыайыылааҕынан тахсыахпыт. Олох хаамыытынан араас мөккүөрдээх да санаа үөскүүр түгэнигэр хайа да өттүгэр аһара барбакка, ортоку сүнньүн тутуһарбыт наада.

Саха сиригэр элбэх ыалдьыт кэлэн ааһар. “Хайа бэйэҕит тылгытынан хаһыаттаах, телевидениелээх, араадьыйалаах эбиккит”, — диэн сөҕө көрөллөр. Биирдэ биир киһи, бэйэҕит национальнай таҥаскытын күннээҕи тэрээһиҥҥэ кытта кэтэр эбиккит, ити сайдыыгытын көрдөрөр диэн хайҕаан турар. Патриотическай иитии итинник бэрт кыраттан уйаланан, үөскээн барар. Бэйэтин омугунан, өбүгэтин алааһынан киэн туттар оҕо кэлин Ийэ дойдутун көмүскээччи-харыстааччы буола улаатар.