Бэрэсидьиэн быыбарыгар дьон кыттыытынан Саха сирэ бэйэтин рекордун олохтуур

Бу иннинэ ситиһиллибэтэх сыыппараны бэрэсидьиэн быыбарыгар номнуо үс күнтэн бастакытыгар Уһук Илин федеральнай уокурук бары эрэгийиэннэрэ ситистилэр. Бээтинсэтээҕи, кулун тутар 15 күнүнээҕи куоластааһын түмүгүнэн, Уһук Илин уокурукка дьон кыттыытын орто көрдөрүүтэ 36,72 % тэҥнэстэ. Биһиги өрөспүүбүлүкэбит Уһук Илин федеральнай уокурукка уонна Арассыыйа бары эрэгийиэннэрин лиидэрдэрин кэккэтигэр киирдэ.

Саха сирэ, Уһук Илин бары макроэрэгийиэннэрин курдук, быыбары тэрийиигэ бэрт эппиэтинэстээхтик сыһыаннаһар. Куоластааһын хаамыыта аһаҕас, бу, дьон бэрэсидьиэн быыбарыгар итэҕэйиилэригэр быһаччы дьайда.

Ол курдук, Уһук Илин бары эрэгийиэннэригэр көдьүүстээх ньыма быһыытынан быыбар хаамыытын уопсастыбаннай кэтээн көрөр институт бэйэтин көрдөрдө.

Уһук Илин федеральнай уокурукка дойду бэрэсидьиэнин талар быыбары 20 тыһ. тахса киһи кэтээн көрөр. Саха сиригэр ити сыыппара 2 тыһ. 433 киһиэхэ тэҥнэһэр. Кинилэр бары үөрэҕи ааспыттара. Ону таһынан, куоластааһын ыытыллар сиригэр видеонан кэтээн көрүүтэ суох биир даҕаны быыбардыыр учаастак суох, 237 быыбардыыр учаастакка турар камераларынан субу көрө олороллор. Өссө  574 учаастак видеоҕа устан ылар тиэхиньикэнэн хааччыллан турар.

“Быыбар ыытыллар бары үс күнүн устата Дьокуускайга СӨ Уопсастыбаннай палаататын уопсастыбаннай кэтээн көрөр киинэ үлэлиир. Ким баҕалаах өрөспүүбүлүкэ хайа баҕарар муннугар турар 237 быыбардыыр учаастак камератынан быһаччы көрөр кыахтаах. Быыбар хаамыытыгар аһаҕас буолуу нэһилиэнньэҕэ куоластааһын быыбар сокуонугар сөп түбэһэн ыытылларын, оттон быыбар түмүгэ Арассыыйа норуотун хараҕар хандьыдааттар дьиҥнээх эриэйтиннэрин толору көрдөрүөҕэ”, — диэн СӨ Уопсастыбаннай палаататын чилиэнэ Николай Барамыгин этэр.

Уһук Илин федеральнай уокуругун олохтоохторо көхтөөхтүк кытталларыгар эрэгийиэннэр салайааччылара эмиэ хааччыйаллар. Нэһилиэнньэни быыбарга барарга бэйэлэрин холобурдарынан көҕүлүүллэр. Салайааччылар бука бары өссө кулун тутар 15 күнүгэр баран куоластаабыттара. Үс салайааччы кэргэттэрин кытта кэлбитэ. Камчатскай кыраай губернатора Владимир Солодов бэрэсидьиэни талар быыбарга бэйэтин куолаһын дойду эрэгийиэннэрин баһылыктарыттан бастакынан биэрбитэ. Кини кэтэхтэн, дистанционнай электроннай куоластааһын систиэмэтин көмөтүнэн быыбардаабыта. Манан кини куоластааһын табыгастааҕын эрэ буолбакка, дистанционнай электроннай куоластааһын сокуоннайын көрдөрдө.

“Уһук Илин уокурукка көхтөөхтүк кыттыы устуоруйаҕа киирэр уонна билиҥҥитэ дойдуга бэлиэни ыйан биэрэр. Быйыл муҥутуур көрдөрүүнэн да, бырыһыанынан даҕаны куоластааччы ахсаанынан рекорду олохтуурга төрүөт баар. Бастатан туран, үс күннээх куоластааһын быыбардааччы бэйэтигэр табыгастаах күнүн таларыгар уонна былаас куоластааһыҥҥа дьону кытыннарарыгар кыах биэрэр” —  диэн политехнолог, Арассыыйатааҕы бэлиитикэҕэ сүбэһиттэр ассоциацияларын чилиэнэ Андрей Мягков этэр.

Кини биир идэлээҕэ, ЭИСИ эрэгийиэннэри кытта үлэҕэ департаменын салайааччыта, территориальнай сайыннарыыга, куорат эйгэтигэр уонна инфраструктураҕа РФ Уопсастыбаннай палаататын хамыыһыйатын бэрэссэдээтэлин бастакы солбуйааччы Дарья Кислицына, Арассыыйа бэрэсидьиэнин талар быыбарга Уһук Илин уокурук бастакы күҥҥэ дьон кыттыытынан рекорд олохтообутунан тус бэйэтин санаатын үллэстэр: “Дойду бэрэсидьиэнэ Владимир Путин Уһук Илин уокурук сайдыытын 21-с үйэҕэ барытыгар инники күөҥҥэ турар соругунан ыйбыта. Мин Уһук Илин уокурукка элбэхтик үлэлиибин, федеральнай уокурук олохтоохторо өйдөөхтөрүн, сымыйаттан кырдьыгы арааралларын истэн эрэ билэр буолбатахпын. Итини таһынан, 2024 сыллааҕы быыбар хаачыстыбалаах атын таһымҥа ыытыллар. Арассыыйа уопсастыбатыгар сомоҕолоһуу туохха да тэҥнээҕэ суох таһыма бэлиэтэнэр”.