Бэрэсидьиэн Дьокуускай сайдыытын туһунан мунньаҕы ыытыаҕа

Бүгүн, балаҕан ыйын 5 күнүгэр, бэрэсидьиэн Владимир Путин видео-сибээһинэн Уһук Илин куораттарын, ол иһигэр Дьокуускай, Анаадыр, Магадаан сайдыыларын туһунан мунньаҕы ыытыаҕа диэн Кириэмил пресс-сулууспата иһитиннэрэр.

Владимир Путин 2021 сыллаахха Илиҥҥи экэнэмиичэскэй пуорум кэмигэр Уһук Илин эрэгийиэннэрин куораттарын маастар-былааннарын олоххо киллэрэр туһунан сорудах биэрбитэ. Дьокуускай уонна Нерюнгри сайдыыларын бырайыагар анал казначейскай кирэдьиит быһыытынан 3,3 миллиард солкуобай көрүлүннэ.

Дьокуускайга 240 миэстэлээх уһуйааны уонна «Спортивнай» түөлбэҕэ элбэх дьайыылаах спортивнай сааланы тутууга 1,2 миллиард солкуобай ананна. Ленин болуоссатын, Сайсары күөл кытылын, 202 түөлбэҕэ даамбаны, кытылы саҥардыыга 1,5 миллиард солкуобай көрүллүөҕэ диэн СИА суруйар.

— Дьокуускай маастар-былаана улахан суолталаах. Бу көннөрү генеральнай былаан буолбатах. Бу куорат инникитин хайдах сайдарын торумнуур докумуон. Манна экэниэмикэ, социальнай уонна тырааныспар эйгэтэ көстөр. Дьокуускай маастар-былаана — Уһук Илиҥҥэ биир саамай үчүгэйдик оҥоһуллубут докумуон буолар, — диэн Айсен Николаев бэлиэтээбитэ.