Бэрэсидьиэн Дьокуускайга Муусука үрдүкү оскуолатыгар сырытта

Бэрэсидьиэн Дьокуускайга В.А.Босиков аатынан Муусука үрдүкү оскуолатыгар сырытта.

1992 сыллаахха тэриллибит Муусука үрдүкү оскуолата Арассыыйа 500 бастыҥ үөрэҕин кэккэтигэр киирэр. Бу туһунан дойду Бэрэсидьиэнин саайта суруйар.

Үөрэх кыһатыгар музыкознание, исполнительскай уонна муусука-тыйаатыр ускуустубатын исписээлинэстэринэн алын, орто уонна үрдүк үөрэх бырагыраамаларыгар үөрэтэллэр. Үөрэнээччилэр сатабылларын хас да ансаамбылга, ону тэҥэ, устудьуоннар уонна оҕолор симфоническай, камернай уонна духовой оркестрдарыгар көрдөрөллөр.

Үөрэх кыһата ойуурдаах сиргэ турар. 240 үөрэнээччигэ аналлаах 52 мас куорпус, бибилэтиэкэ, кэнсиэртиир саала, 150 иитиллээччи олорор дьиэтэ бааллар. Ону тэҥэ, дорҕоону устар устуудьуйа, фонотека хоһо, успуорт, оҕо былаһааккалара бааллар.

Владимир Путин Муусука үрдүкү оскуолатыгар сылдьыан иннинэ, кэлэр нэдиэлэҕэ «Азия оҕолоро» спортивнай оонньуулар ыытыллыахтаах Туймаада стадиону көрдө. Стадионтан баран иһэн дойду баһылыга массыынаны тохтотон кылгастык олохтоохтору кытта кэпсэттэ.