Бэрэсидьиэн сорудаҕынан дойдуга дьиэ кэргэни өйүүр тиһиги тупсарыахтара

Саха сирин Бырабыыталыстыбатын Бэрэссэдээтэлин солбуйааччы Георгий Степанов Арассыыйа Бэрэсидьиэнэ Владимир Путин пресс-кэмпириэнсийэтин – быһа эпиирин туһунан комментарийдаата.

Вице-премьер бэлиэтээбитинэн, Бэрэсидьиэн пресс-кэмпириэнсийэтигэр дьиэ кэргэни өйүүр боппуруоска улахан болҕомтотун уурда. Дойдуга биир улахан быһаарыынан 2026 сыл тохсунньу 1 күнүттэн биирдиилээн киһи дохуотуттан нолуокка төлүүр 13% -тан, тиинэн олоруу алын кээмэйиттэн 1,5 төгүл намыһах буоллаҕына – 7% төннөрүллэр кыахтаныаҕа.

«Владимир Путин дойдуга дьиэ кэргэни өйүүр тиһиги тупсарыахтара диэтэ, тоҕо диэтэххэ судаарыстыба бары бэлиитикэтэ федеральнай да, эрэгийиэннээҕи да таһымҥа ону тула эргийэр. Бэрэсидьиэн Бырабыыталыстыбаҕа оҕо 1,5 уонна 3 саастарын икки ардыгар тахсыбыт «арахсыыны» хайдах быһаарары толкуйдуур соругу туруорда. Бу боппуруоһу олус элбэх ийэлэр туруораллар. Бүгүн бу төлөбүр оҕону 1,5 сааһыгар диэри көрүүгэ бэриллэр. Ону тэҥэ дойду баһылыга чэпчэтииилээх дьиэ кэргэн ипотекатын харыстыыр суолтатын бэлиэтээтэ», — диэтэ Георгий Степанов.
2025 сылга Саха сиригэр 22 тыһыынчаттан тахса элбэх оҕолоох ыал социальнай өйөбүлүнэн хааччыллыбыта.
2025 сыл саҕаланыаҕыттан » Дьиэ кэргэн» национальнай бырайыак тэрээһиннэригэр Саха сиригэр 6 миллиард солкуобайтан тахса үбүлээһин ыытыллыбыта, ол иһигэр өрөспүүбүлүкэтээҕи бүддьүөттэн 3,8 миллиард. «Дьиэ кэргэни өйөөһүн» эрэгийиэннээҕи бырайыагынан 3,4 миллиард солкуобай көрүллүбүтэ. Бу бырайыак чэрчитинэн 1 уонна 2 оҕо төрөөбүтүгэр 4 тыһыынчаттан тахса дьиэ кэргэн өйөбүлү ылбыта. 2,7 тыһыынчаттан тахса ыал өрөспүүбүлүкэтээҕи ийэ хапытаалын туһаммыта. Быйылгыттан бу хапытаал 3 уонна онтон кэлэр оҕо төрөөтөҕүнэ бэриллэр. Ол кээмэйэ быйыл 316 200 солкуобай. Ону тэҥэ «Элбэх оҕолоох ыал» эрэгийиэннээҕи бырайыак чэрчитинэн кэлим тэрээһиннэр олоххо киирэллэр.