Бэрэсидьиэн сорудахтара дьиэ тутуутугар саҥа тэтими биэриэхтэрэ

Арассыыйа бэрэсидьиэнэ Владимир Путин бэрэссэдээтэллээх Судаарыстыбаннай Сэбиэт Президиумун «Олоххо наадалаах инфраструктураны сайыннарыыга» аналлаах мунньаҕа ыытылынна.

Мунньах түмүгүнэн, судаарыстыба баһылыга Арассыыйа Бырабыыталыстыбатыгар бэс ыйын 15 күнүгэр диэри олорор дьиэ эйгэтин өйүүр эбии миэрэлэргэ этиилэри бэлэмнииллэрин сорудахтаата. Ол иһигэр 14-гэр диэри саастаах оҕолоох ыалларга, ону тэҥэ байыаннай дьайыы кыттыылаахтарыгар чэпчэтиилээх ипотека бырагыраамаларын кэҥэтии баар.

Владимир Путин тоһоҕолоон эппитин курдук, бу дойду территорияларын салгыы сайыннарыыга, тупсарыыга, бары эрэгийиэннэргэ табыгастаах, куттала суох уонна аныгы эйгэни тэрийиигэ, дьиэ боппуруоһун быһаарыыга, үлэ миэстэтинэн хааччыйыыга, тырааныспарынан уонна социальнай өҥөлөргө киирэргэ, үрдүк хаачыстыбалаах суоллары оҥорууга сыһыаннаах.

Саха Өрөспүүбүлүкэтэ билигин дьиэ тутуутугар бигэ үүнүүнү көрдөрөр. Ааспыт уон сылга эрэгийиэҥҥэ 6,5 мөл. кв. м дьиэ үлэҕэ киирбитэ. 2024 сылга сэбиэскэй кэмтэн ыла куоһарылла илик көрдөрүү ситиһиллибитэ — 752 тыһ. кв. м. тутуллубута. Өрөспүүбүлүкэ тутуутун миниистирэ Виктор Романов Бэрэсидьиэн сорудаҕа эрэгийиэҥҥэ тутуу салаата сайдыытыгар эбии күүс-көмө буолуоҕун бэлиэтээтэ.

«Өрөспүүбүлүкэҕэ дьиэ тутуута тэтимнээхтик барар. Биэс сыл иһигэр кэтэх дьиэни туттуу икки төгүл улаатта. Саахалламмыт туруктаах дьиэлэртэн көһөрүү бырагырааматын чэрчитинэн элбэх кыбартыыралаах тутуу эмиэ күүскэ барар», — диэн миниистир эппитин @МинстройЯкутия иһитиннэрэр.