Бэрэсидьиэн субсидиятынан Саха сиригэр үс модульнай успуорт саалатын астылар

Бэрэсидьиэн субсидиятынан Дьокуускай куорат 10 уонна 20 №-дээх оскуолаларыгар уонна Алдан куорат гимназиятыгар үс успуорт комплекса тутулунна диэн СӨ Баһылыгын уонна Бырабыыталыстыбатын пресс-сулууспата иһитиннэрэр.

Успуорт саалалар Бэрэсидьиэн Уһук Илиннээҕи «Биир кэлим субсидия» үбүлээһининэн тутулуннулар уонна хааччылыннылар. Үбүлээһин судаарыстыба баһылыга Владимир Путин сорудаҕынан федеральнай бүддьүөттэн тыырыллаллар уонна «Үөрэхтээһин» национальнай бырайыагынан тутууга, өрөмүөннээһиҥҥэ уонна социальнай эбийиэктэри саҥардыыга туһуланаллар.

Бу үс саала үһүөн успуорт араас көрүҥүнэн дьарыктанарга наадалаах  тэрилинэн  толору хааччылынна. Дьокуускайга баар икки саала 466 кв.м. иэннээхтэр. Саалаларга физкультура уруоктарыгар, ону сэргэ успуорт араас көрүҥүнэн эбии дьарыктаныахтара диэн Дьокуускай куорат 10 №-дээх орто оскуолатын физкультураҕа учуутала Евгений Балыков кэпсээтэ.

«Биһиги оскуолабыт – Дьокуускай куорат биир саамай спортивнай оскуолаларыттан биирдэстэрэ. Биһиэхэ успуорт араас көрүҥэр: футболга, каратэҕэ, көҥүл тустууга, дзюдоҕа успорт араас көрүҥнэригэр өрөспүүбүлүкэтээҕи уонна Уһук Илиннээҕи күрэхтэһиилэр призердара бааллар. Бүтүн Арассыыйатааҕы күрэхтэһиилэр призердара уонна кыайыылаахтара эмиэ бааллар. Бүтүн Арассыыйатааҕы күрэхтэһиилэр призердара уонна кыайыылаахтара бааллар. Элбэх оҕо успуордунан дьарыктанар, онон эбии саала хайаан даҕаны наада этэ. Мантан инньэ куорат уонна өрөспүүбүлүкэ күрэхтэһиилэрэ биһиэхэ ыытыллаллара буоллар үөрүө этибит», — диэтэ физкультура учуутала.

Өрөспүүбүлүкэҕэ Бэрэсидьиэн субсидиятынан тутуллубут успуорт саалалартан саамай улаханынан  Алдан гимназиятын саалата буолар.

Санатан эттэххэ, РФ Бэрэсидьиэнин «Биир кэлим субсидиятын» чэрчитинэн Уһук Илин уокуругар 1,6 тыһ. кэриҥэ эбийиэк, ол иһигэр 67 балыыһа, 153 оскуола, 30 оҕо уһуйаана, 43 култуура уонна сынньалаҥ, 63 успуорт эбийиэгэ тутулунна. Ону таһынан социальнай эбийиэктэргэ саҥа оборудованиелар атыылаһыллаллар.