Бэрэсидьиэн Уһук Илиҥҥэ инженернэй оскуолалары сайыннарыыга үлэлэһэргэ эрэннэрдэ

Арассыыйа Бэрэсидьиэнэ Владимир Путин Уһук Илин уокурукка инженернэй оскуолалар бырагыраамаларын сайыннарыыга үлэлэһэргэ эрэннэрдэ. Судаарыстыба баһылыга онуоха Саха сиригэр олус үчүгэй математическай оскуола баарын бэлиэтээтэ.

«Мин билигин чопчу сыыппараны этиэм суоҕа да буоллар, мин билэрбинэн бу бырагырааманан 100 инженернэй оскуолалары сайыннарыыга биһиэхэ 41 миллиард солкуобай көрүллүбүтэ. Биллэн турар, Уһук Илиҥҥэ бу боппуруоһунан хайаан да үлэлэһиэхпит», — диэн Владимир Путин этиитин РИА Новости иһитиннэрэр.

Судаарыстыба баһылыга Уһук Илин уокурукка, чуолаан Саха сиригэр олус үчүгэй математическай оскуола баарын бэлиэтээтэ. «Онон бааза олус үчүгэй, үлэлиибит», — диэн кини түмүктээтэ.