Бэргэнник ыраахтан ытыыга күрэх саҕаланна

Дьокуускай куоракка «Сулус» үөрэтэр-ытар кииҥҥэ Сэбиэскэй Сойуус Дьоруойа Федор Матвеевич Охлопков кэриэһигэр ыытыллар ыраахтан ытыыга Бүтүн Арассыыйатааҕы турнир үгүс киһини түмтэ.

Күрэхтэһии икки күн ыытыллыа. Дойду араас эрэгийиэннэриттэн 100-кэ киһи кыттар. Кинилэр икки күн устата квалификационнай, күнүскү, түүҥҥү ытыыга түһүмэхтэри ааһыахтара. Дойду ааттаах-сурахтаах снайпердара бастыыр иһин болҕомтолорун, сатабылларын ууран, кыраҕытык кыҥаан киирсиэхтэрэ.

Санатан эттэххэ, олунньуга ыытыллыбыт күрэххэ уопсай түмүгүнэн Чурапчы чулуу уолаттара – снайпер Сергей Яковлев уонна корректировщик Василий Яковлев — бастаабыттара. Кинилэргэ пикап массыына күлүүһэ туттарыллыбыта.