Бэрик биэрэн суоппар дастабырыанньатын ылаары…

Арассыыйа Силиэстийэлиир кэмитиэтин Саха сиринээҕи салаатын Бүлүү оройуонун силиэстийэлиир отдела 27 саастаах эр киһи сокуону кэспитин дакаастаан суукка дьыала киллэрдэ. Кини РФ Холуобунай кодексатын 291 ыст. 3 ч. көрүллэр сокуону кэһиигэ соруммутунан буруйданна (дуоһунастаах киһиэхэ атын киһи нөҥүө бэрик биэрии).

Силиэстийэ уонна суут быһаарбытынан, 2022 сыл балаҕан ыйыгар сууттанааччы Интэриниэт ситимигэр биллибэт киһини кытары теоретическай уонна практическай эксээмэни туттарбакка эрэ суоппар дастабарыанньатын ыларга көмөлөһөр туһунан суруйсубут.

Бу туһунан Силиэстийэлиир кэмитиэт Саха сиринээҕи салаатын пресс-сулууспата иһитиннэрэр.

Сууттанааччы сөбүлэспит уонна баан сыһыарыытынан харчы ыыппыт. Сотору буолан баран, сууттанааччы почта сибээһин нөҥүө бэйэтин аатыгар сымыйа суоппар дастабырыанньатын туппут. Сууттанааччы баҕа санаата толору туолбатах, тиксэрээччи киһи бэриги эмиэ биэрбэтэх.

Сууттанааччы буруйдааҕынан билиниллэн, киниэхэ суут ыстараап төлүүргэ уурда.