«Берлиҥҥэ тиийэр суол» аахсыйаҕа кыттыстылар

Горнай улууһун Бэрдьигэстээх сэлиэнньэтин «Түмэн» аҕам саастаах көлүөнэ  киинин актыбыыстара «Берлиҥҥэ тиийэр суол»  аахсыйаҕа кыттыстылар.

Бэрдьигэстээхтэн Берлиҥҥэ диэри суол уһуна — 10 238 килэмиэтир. Биһиги эһэлэрбит бу бачча уһуннаах эр санааланыы суолунан айаннаан, кырыктаах кыргыһыыларга сэриилэһэ-сэриилэһэ, Берлиҥҥэ тиийэн, Кыайыы өрөгөйүн билэн, аан дойдуну фашизмтан быыһаатахтара.

«Түмэн» актыбыыстара эмиэ бачча уһуннаах суолунан хаамар былааннаахтар. Кинилэр хас күн аайы хаампыт хаамыыларын ааҕан баран («шагомер» көмөтүнэн), «Эрчим» хаалыктаах хаамыы кулуубун бөлөҕөр суруйан иһэллэр. Түмүгэр, барытын ааҕан-суоттаан, Кыайыы күнүгэр диэри уопсайа 10 238 килэмиэтиргэ тиэрдэр былааннаахтар. Бу туһунан Социальнай пуонда Саха сиринээҕи салаата иһитиннэрэр.

— Биһиги бу бырайыакка кыттарбытынан киэн туттабыт. Аҕа дойду сэритиигэр Горнай улууһуттан 886 киһи ыҥырыллан барбыта. Кинилэр ортолоругар мин аймахтарым бааллара, сорохторо эргиллибэтэхтэрэ. Кинилэр дьоруойдуу быһыыларыгар сүгүрүйэн, киэн туттан, кэриэстээн, бу Албан аат суолунан күннэтэ хаамыахпыт, — диэн киин актыбыыската Людмила Чемезова кэпсээтэ.