Бэрт Ууһугар бэртээхэй субуотунньук

Уус Алдаҥҥа Бэрт Ууһугар муус ылыытыгар нэһилиэк эр дьоно көхтөөхтүк кытыннылар. Үс чаас иһигэр 1000 кэриҥэ муус ылылынна.

Сыырдаах эбэтигэр, От Тумулга мустан муус ылыытыгар субуотунньук ааттааҕа буолла. Муус байыаннай дьайыы кыттыылаахтарын дьиэ кэргэттэригэр, социальнай харалта көрөр аҕам саастаах дьонугар, балыыһаҕа түҥэтиллэр.
Муус ылыытыгар уопсайа 28 киһи үлэлээтэ. Элбэх буоламмыт икки чардаатынан арахсан, үс чаас иһигэр 1000 кэриҥэ муус ылылынна.

Үлэ быыһыгар сынньанан ыла таарыйа тиэрмэстэн итии чэй иһэргэ олохтоох балыыһабыт кэлэктиибэ сылаас бэрэски, арыылаах алаадьы астаан ыыппыттарын үөрэ-көтө амсайдыбыт. Таһаарыылаах үлэттэн бары да үөрдүбүт, санаабыт көтөҕүлүннэ. Онон түмүккэ муҥхалыы барарга бу курдук түмсүөҕүҥ дэстибит.

Күргүөмнээх үлэҕэ кыттыбыт бары дьоммутугар,  сылаас астаах балыыһабыт кэлэктиибигэр махталбытын тиэрдэбит!

Илья Ильин,

нэһилиэк баһылыга, Уус Алдан

Хаартыскалар уонна видео олохтоох дьаһалта  тиксэриилэрэ