Бэс ыйыгар ханнык улахан тэрээһиннэр, бырааһынньыктар буолуохтарай?

Саха сиригэр быйыл бэс ыйыгар үрүҥ тунах ыһыахтарыттан саҕалаан өрөспүүбүлүкэҕэ аан бастакытын федеральнай таһымнаах Сабантуй буолара күүтүллэр. Маны таһынан араас улахан тэрээһиннэр ыыттыллалара былааннанар.

Бэс ыйыгар ханнык улахан тэрээһиннэр, бырааһынньыктар буолуохтарай?

Арассыыйа күнэ

Арассыыйа күнүгэр, бэс ыйын 12 күнүгэр, Дьокуускай куорат олохтоохторун уонна ыалдьыттарын Өрөспүүбүлүкэ болуоссатыгар «Олоҥхо сирин Фанфарата» норуоттар икки ардыларынааҕы духуобунас оркестрдарын V эрэгиийиэннэр икки ардыларынааҕы бэстибээл үөрүүлээх сабыллыытыгар ыҥыраллар. Ону сэргэ киин куорат Ю.А. Гагарин аатынан култуура уонна аныгы ускуустуба киинигэр Судаарыстыбаннай филармония «Lena River Brass» духовой оркестр кэнсиэрэ буолуоҕа.

Бакалдын-2025

«Бакалдын-2025» эбээннэр бырааһынньыктара бэс ыйын 6-8 күннэригэр «Бакалдын» этно-кииҥҥэ ыытыллар. Быйыл тэрээһини Уус Маайа улууһа тэрийэр. Тэрээһиннэр ортолоругар сиэр-туом, «Победа за нами» улуустарынан патриотическай аахсыйа, куонкурустар, успуорт национальнай көрүҥнэригэр күрэхтэһиилэр, гастро-шоу уонна бренд-шеф Николай Атласовтан эбэҥки аһын дегустацията, баянист-виртуоз Владимир Боярскай бырааһынньыктааҕы бырагыраамата.

Сабантуй

Федеральнай Сабантуй бэс ыйын 13-14 күннэригэр Дьокуускай куоракка үс былаһаакканан буолар: «Туймаада» стадиоҥҥа, култуура уонна сынньалаҥ пааркатыгар уонна Комсомольскай болуоссакка. «Татаар дыбарыаһыгар» татаар норуотун олоҕун-дьаһаҕын, төрүт үгэстэрин кытта билиһиннэриэхтэрэ: эспэнээттэр, ас-үөл, мал-сал. Татарстантан Буинскай судаарыстыбаннай драматическай тыйаатыр «Небесный тихоход» испэктээги, ону тэҥэ Татарстан киинэтин күннэрэ буолуоҕа.

Сергей Зверев-Кыыл Уола аатынан үбүлүөйдээх ыһыах

Бэс ыйын 20-21 күннэригэр Сунтаар сэлиэнньэтигэр саха норуодунай ырыаһыта, олоҥхоһута, Саха сценическэй уонна үҥкүү културатын төрүттээбит Сергей Афанасьевич Зверев-Кыыл Уолугар анаммыт ыһыах бырааһынньыга буолар. Бэс ыйын 11 күнүттэн саҕалаан Сергей Зверев- Кыыл Уола төрөөбүт сэлиэнньэтигэр 61 тэрээһин ыытыллар: уустар, норуот маастардарын быыстапкалара, успуорт күрэхтэһиилэрэ, быыстапкалар, кэнсиэртэр, ону сэргэ «Сэргэй Зверев – Кыыл Уола үөскээбит эйгэтэ уонна айымньылаах алтыһыыта» диэн кинигэ билиһиннэриитэ. Сергей Зверев олоҥхотунан «Кыыс Кыыдаан» айымньыны национальнай үҥкүү тыйаатыра көрдөрүөҕэ.

Аармыйа култууратын күннэрэ

Аармыйа култууратын күннэрэ Дьокуускайга бэс ыйын 24-29 күннэригэр ыытыллыахтара. Бырайыак бырагырааматынан көрсүһүүлэр, быыстапкалар, пленердэр, маастар- кылаастар, куонкурустар, испэктээктэр, научнай- практическай кэмпириэнсийэлэр о.д.а. буолуохтара. 2023 сыллаахха Аармыйа култууратын күннэрэ Тываҕа, былырыын Тульскай уобаласка уонна Санкт-Петербурга, быйыл олунньуга Башкортостаҥҥа ыытыллыбыттара.

«Үтүө симфония» бэстибээл

Бэс ыйын 23-30 күннэригэр «Үтүө симфония» («Симфония добра») муусуканы толоруу норуоттар икки ардыларынааҕы бастакы куонкуруһа былааннаннар. Куонкурус түмүгүнэн Уһук Илиҥҥи федеральнай уокурук бастакы ыччат симфоническай оркестрын тэрийиэхтэрэ. Оркестар бэс ыйын 29 күнүгэр гала-кэнсиэркэ кыттыаҕа. Оркестр састааба куонкурус лауреаттарыттан тэриллиэҕэ. Бэс ыйын 24 күнүгэр Опера уонна балет судаарыстыбаннай тыйаатырын сыанатыгар 15 ыҥырыылаах артыыс уонна уһулуччулаах учууталлар кыттыылаах улахан кэнсиэр буолуоҕа. Бэс ыйын 26 күнүгэр киин куорат олохтоохторо уонна ыалдьыттара үҥкүү национальнай тыйаатырын аһаҕас халлаан анныгар үөрүүлээх кэнсиэргэ сылдьыахтарын сөп.

Астана куорат күннэрэ

Бэс ыйын 26-28 күннэригэр Дьокуускайга Астана куорат күннэрэ ыытыллыахтара. Казахстантан дэлэгээссийэ састаабыгар Акимат бэрэстэбиитэллэрэ, култуурунай бырагыраама кыттыылаахтара, биисинэс уопсастыба, туризм, цифровизация уонна креативнай индустриялар эйгэлэрин бэрэстэбиитэллэрэ киириэхтэрэ. «Алия» испэктээк уонна «Якутия- Астана» норуоттар икк ардыларынааҕы биисинэс-пуорум буолаллара былааннанар. Пуорум чэрчитинэн «Цифровизация уонна креативнай индустрия эйгэтигэр бииргэ үлэлээһини сайыннарыы», «Туризм эйгэтигэр бииргэ үлэлээһини сайыннарыы» дьыалабыай сиэссийэилэри ыытыы былааннанар. Култуура бырагырааматынан чаҕылхай түгэнинэн Опера уонна балет тыйаатырыгар гала-кэнсиэр буолуоҕа.

Туймаада Ыһыаҕа

Бэс ыйын сүрүн бырааһынньыгынан, Саха сирин бары олохтоохторун сомоҕолуур «Туймаада ыһыаҕын» национальнай бырааһынньыга быйыл бэс ыйын 28-29 күннэригэр ыытыллыаҕа. Быйылгы ыһыах дойдуга Аҕа дойдуну көмүскээччи, Улуу Кыайыы 80 сылыгар уонна Саха сиригэр Ийэ дойдуну көмүскээччи сылыгар ананар.