Бэс ыйын 10 күнэ – Арассыыйаҕа бааһынай (пиэрмэр) күнэ

Бүгүн, бэс ыйын 10 күнүгэр,  Арассыыйааҕа бааһынай (пиэрмэр) идэлээх бырааһынньыга бэлиэтэнэр.

Бааһынай күнүн аан бастакытын 2002 сыллаахха Саратовскай уобалас Тыа хаһаайыстыбатын кэпэрэтииптэрин, бааһынай уонна пиэрмэр хаһаайыстыбаларын Ассоциацията тэрийэн бэлиэтэммитэ.  Онтон 2007 сылтан бу көҕүлээһини дойду атын эрэгийиэннэрин тыа хаһаайыстыбатын оҥорон таһаарааччылара өйөөбүттэрэ. Ол курдук, бэс ыйын 10 күнэ Арассыыйаҕа тыа хаһаайыстыбатын салаатыгар тутаах бэлиэ күнүнэн ааҕыллар.

Арассыыйа Бэрэсидьиэнэ Владимир Путин бэлиэтииринэн, сыллата дойдуга пиэрмэрдээһин агробырамыысыланнай салааҕа бэйэ оҥорон таһаарар бородууксуйатынан хааччыйыыга сүҥкэн суолталаах. Пиэрмэрдэр тыа сирин сайыннараллар уонна аһынан-үөлүнэн куттала суох буолууну хааччыйаллар.

Дойду үрдүнэн Саха сирэ тыа хаһаайыстыбатын эйгэтигэр урбанньыттарын ахсаанынан лидердэр ахсааныгар киирэр, ол курдук хас биирдии 1000 киһиэхэ үс киһи бааһынайынан үлэлиир.

Санаттахха, Бүлүү, Ленскэй, Нам, Нерюнгри, Томпо, Уус Алдан, Хаҥалас, Чурапчы улуустарын уонна Дьокуускай куорат 17 пиэрмэр хаһаайыстыбалара бэйэ дьиэ кэргэн дьыалатын кэҥэтиигэ судаарыстыбаттан 156,5 мөл. солк. суумалаах көмө туһаммыттара. «Агростартап» гранын бырагырааматынан 22 саҥа саҕалаабыт пиэрмэрдэргэ 101,8 мөл. солк. суумалаах субсидия бэриллибитэ.