Бэстибээлгэ «Брусничка» Саха сирин амтанын амсатта

Ийэ айылҕаҕа үүнэр аһылык киһи этигэр-сиинигэр ордук иҥэмтиэлээх. 

Ол да иһин «Саха сирин амтана» гастрономическай бэстибээлгэ кыттар эрээстэрээннэр  саха төрүт аһын туттар буоллулар. Кэрэхсэбиллээҕэ баар, саха аһын амтанын дьоҥҥо-сэргэҕэ тарҕатар быйылгы суолталаах тэрээһиҥҥэ “Өбүгэ аһа” диэн туспа маастар-кылаас тэрийдилэр. Манна «Брусничка» айар түмсүү ХИФУ устудуьуоннары аһатар «Сэргэлээх» ас кэмбинээтигэр баҕалаах дьону мунньан, анал маастар-кылааска өбүгэ саҕаттан кэлбит аһы астыырга үөрэттэ.

«Брусничка» айар түмсүү суолталаах тэрээһиҥҥэ кыттыытын туһунан Екатерина Курчатова маннык кэпсээтэ:

— «Саха сирин амтана» гастрономическай бэстибээл туһунан истэн билэбит. Ол эрээри хаһан да кытта иликпит. Быйылгы тэрээһиҥҥэ СӨ Ыалдьытымсах буолуу ассоциациятын чилиэнэ, өҥө (сервис) эспиэрэ Сардаана Григорьева ыҥырыытынан кытынныбыт.

Биллэн турар, маннык улахан таһымнаах бэстибээлгэ  кыттыыбыт биһиэхэ олус улахан суолталаах. Быйыл балаҕан ыйыгар Виктория Петрова, Сахаайа Дорос уонна мин, Екатерина Курчатова, «Брусничка» диэн ааттанан түмсүү тэринэн, бэйэбит кыахпытын сайыннарыыга, оҥорон таһаарар бородууксуйабытын билиһиннэриигэ,  сонун хайысхалары тобулууга ылсыбыппыт.

Маныаха үс сыллааҕыта «Алгыс От» уһуйааҥҥа үөрэнэн, эмтээх от эйгэтигэр уһуйуллубуппут олус туһалаата. Онон билигин бэйэбитин киэн эйгэҕэ билиһиннэрэн, оҥорон таһаарар бородууксуйабытынан»Саха сиригэр оҥоһулунна» бырайыакка кыттыһан, олохтоох табаары оҥорооччулар кэккэлэрин кэҥэтэр соруктаахпыт.

Үгүс дьон тоҕо «Брусничка» диэн ааттанныгыт диэн ыйыталлар. Биһиги оҥорон таһаарар бородууксуйабыт бэлэххэ туһаайыллан оҥоһуллар. Онон бу нууччалыы тылга  Саха сирин кэрэ айылҕата, ото-маһа сахаларга эрэ диэн буолбакка, манна олохтоох араас омук дьонугар кытта күүс-көмө буолар.

Дойду таһымыгар тахсар дабааннары эмиэ дабайар соруктаахпыт. Онуоха «Саха сирин амтана» гастрономическай бэстибээлгэ кыттыыбыт биһиэхэ олус улахан суолталаах. 

“Өбүгэ аһа” маастар-кылааска кэлбит дьону «брусничкалар» өбүгэ саҕаттан кэлбит өбүгэ астарын астыырга үөрэттилэр, араас туманы, чэйи атыыластылар.