Бэстибээли саастаах көлүөнэ кэнсиэрэ түмүктээтэ

Улуу  Кыайыы 80 сылынан Кэбээйи улууһун Ньидьили нэһилиэгэр  А.С. Борисов аатынан «Тускул» култуура сайдыытын киинэ көлүөнэлэр икки ардыларыгар «Түмсүөҕүҥ, сомоҕолоһуоҕуҥ — эйэлээх олоҕу тутуоҕуҥ» диэн фестивальнай кэнсиэртэри тэрийбитэ. Бэстибээли саастаах көлүөнэ кэнсиэрэ түмүктээтэ.

Кэнсиэр иннинэ үөрүүлээх быһыыга-майгыга Иван Васильевич Ивановка -Уйбаан Чагдаҕа «Саха  Өрөспүүбүлүкэтин култууратын үтүөлээх үлэһитэ» үрдүк ааты олохтоох дьаһалта баһылыга  Айыл  Седельников туттарда.   Онтон салгыы «Тускул» култуура сайдыытын киинин дириэктэрэ В.С. Егоров, олохтоох балыыһа сэбиэдиссэйэ М.И. Яковлева,  «Далбар» эбээлэр түмсүүлэрин салайааччыта Д.К. Кондакова, «Дьиэрэй»  дьахталлар вокальнай ансаамбылларыттан Л.Н. Дмитриева уонна бэйэлэрин репертуардарыттан ырыа ыллаан бэлэх ууннулар. Маны таһынан 2006 сылтан оҕо курдук бүөбэйдээн, «Норуодунай» аакка тиийэ үүммүт «Ньидьили уолаттара» ансаамбыл аатыттан К.С. Эверстов эҕэрдэтин эттэ уонна сэмэй бэлэхтэрин туттардылар. Бу  үөрүүлээх түгэн кэнниттэн сэрии сылын оҕолоругар М.И. Дмитриеваҕа, А.П. Неустроевка уонна сыана бэтэрээнигэр И.С. Эверстовка Саха Өрөспүүбүлүкэтин «Ытык Сүбэ» аатыттан бэлиэлэри Л.И. Борисова туттарда.

Түмүк кэнсиэр ССРС кэминээҕи көхтөөх ыччаттар күргүөмүнэн кыттан үрдүк таһымнаахтык ааста. Бииртэн биир сонун, үчүгэй нүөмэрдэр, киһи эрэ истэ олоруох  ырыалара, сценкалара, үҥкүүлэрэ толорулуннулар. Ырыалары И.В.Иванов, Д.П.Дьяконов бэлэмнээтилэр.Үҥкүүлэри  К.И.Татаринова туруорда, сценкалары И.И.Эверстова блэмнээтэ, кэнсиэри иилээн-саҕалаан А.С.Ноговицына уонна Н.Н.Эверстов ыыттылар.

Улуу Кыайыы 80 сылыгар аналлаах тэрээһиннэр көлүөнэнэн ыытылланнар, нэһилиэк олохтоохторун көхтөөх уонна түмсүүлээх оҥордулар.

Альбина Ноговицына, А.С. Борисов аатынан «Тускул» култуура сайдыытын киинин уус-уран салайааччыта.