Бэтэрээн Наум Слепцов турнирыгар ким кыайда?

Дьокуускайга Аҕа дойду сэриитин кыттыылааҕа Наум Слепцов бирииһигэр бэтэрээннэр уонна ыччаттар сүүмэрдэммит хамаандаларын икки ардыларыгар шахмакка уонна дуобакка турнир түмүктэннэ.

Бу илин-кэлин түсүһүүгэ 10 сыл иһигэр аан бастаан бэтэрээннэр хамаандалара кыайыыны ситистэ. Уопсайа 96:64 счетунан кыайдылар.

XIV турнир Улуу Кыайыы 80 бэлиэ сылынан ыытылынна. Онон барыта 80 дуоскаҕа 160 эдэр дуобатчыт, шахматист уонна чугастааҕы улуустартан интеллектуальнай успуорт бэтэрээннэрэ кыттыыны ыллылар.

Саамай аҕам саастаах спортсмен Иннокентий Егомин. Сааһа — 87. Кини утарылаһааччыта Давид Симонян, сэттэлээх.

Дуобакка бэтэрээннэр хамаандалара 43 партияҕа кыайда, шахмакка — 53.  Бэтэрээннэр эдэр спортсменнары кытта оонньоон кыайыыны уон сыллааҕыта, о.э. 2015 сыллаахха ылан тураллар.

Наум Трифонович бу турниры бэйэтин ууруммут харчытынан уонна бэтэрээнин биэнсийэтинэн саҕалаабыта. Көҕүлээһини сэргээн, сэҥээрэн Дьокуускай дьаһалтата уонна успуорт министиэристибэтэ кыттыспыттара. Кэлин турнир Кыайыы күнүн көрсө үрдүк таһымнаахтык ыытыллар.

—-Быйылгы турнир ураты буолла. Кыайыы үбүлүөйдээх 80 сылыгар ыытылынна. Өссө быйыл турниры төрүттээччи Наум Трифонович 101 сааһын туолбута. Ытык кырдьаҕас бачча сааһыгар чэгиэнник-чэбдиктик сылдьара үөрдэр. Шахмакка уонна дуобакка оскуола үөрэнээччилэриттэн саҕалаан бэтэрээннэргэ тиийэ күрэхтэстилэр. Онуоха бу спортивнай күрэхтэһии эрэ буолбакка, манна кэлбит дьон билсэр, сэһэргэһэр, үөрүйэхтэрин атастаһаллар, билиилэрин-көрүүлэрин тарҕатар кыахтаналлар.

Наум Трифоновичка маассабай успуорду сайыннарыыга кылаатын иһин уонна биллэн турар, Кыайыы иһин сүһүөхтээх бэйэбит сүгүрүйэбит. Турнир бары кыттыылаахтарыгар саҥаттан саҥа ситиһиилэри баҕарабын, — диэтэ Ил Дархан Айсен Николаев.

Күрэхтэһии түмүгүн туһунан этэригэр Наум Слепцов:  «Мин бу турнир уон төрдүс төгүлүн ыытылларыттан үөрэбин уонна киэн туттабын. Манна билэр элбэх бэтэрээним кыттыбаттарын да иһин, көрө кэлбиттэр.  Хата, кинилэри көрсөн, кэпсэтэн наһаа үөрдүм. Кыаллар буоллаҕына, эһиил үбүлүөйдээх 15-с турнир эмиэ бу курдук ыытыллара буоллар диэн баҕарабын«, — диэтэ.

Наум Слепцов быйыл кулун тутарга 101 сааһын туолбута. Кини Аҕа дойду сэриитин бэтэрээнэ, Аҕа дойду сэриитин II  истиэпэннээх уордьан кавалера, «Отличный пулеметчик» бэлиэнэн наҕараадаламмыт, «За Победу над Японией» мэтээллээх. Японияҕа Квантун аармыйатын урусхаллааһыҥҥа кыттыбыт.

СӨ Ил Дарханын уонна Бырабыыталыстыбатын пресс-сулууспата

Сиһилии: https://www.sakha.gov.ru/news/3908  манна ааҕыаххытын сөп.