Хаартыска: СИА.
Бүтүн Арассыыйатааҕы «Тиэргэнинэн ыллыыбыт» аахсыйа чэрчитинэн, ыам ыйын 6 күнүгэр Дьокуускайга олорор сэрии бэтэрээннэрин эҕэрдэлээтилэр. 203-с түөлбэҕэ олорор Петр Яковлевы бырабыыталыстыба бэрэссэдээтэлин солбуйааччы Сергей Местников, тиийэн, эҕэрдэлээтэ. Эстрада тыйаатырын артыыстара Кыайыы туһунан үйэлээх ырыаларын бэлэхтээтилэр.
Петр Константинович Яковлев — Японияны утары сэрии бэтэрээнэ, Аҕа дойду сэриитин II истиэпэннээх уордьанын, икки «Бочуот Знага» уордьан кавалера, Саха сирин норуотун хаһаайыстыбатын үтүөлээх үлэһитэ, Сунтаар улууһун Бочуоттаах олохтооҕо.
— Улуу Кыайыы күнүн көрсө үгэскэ кубулуйбут аахсыйабытын ыытабыт. Бу күн сэрии бэтэрээннэрин көрсөн, кэпсэтэн, эҕэрдэлиибит, махтал тылларын этэбит, кинилэр олохторун, хорсун быһыыларын, үлэлэрин ахтабыт-саныыбыт. Петр Константинович үүнэр көлүөнэҕэ холобур буолар киһи. Оҕолорун, сиэннэрин, хос сиэннэрин үтүө дьон буолалларын курдук кыһаллан иитэн таһаарбыта, кинилэр эһэлэрин олус таптыыллар, сыаналыыллар. Кини мэлдьи көхтөөх, туох баар уопсастыбаннай тэрээһиннэргэ кыттар. Бу улуу бырааһынньыкка киниэхэ чэгиэн доруобуйаны, дьолу баҕарабыт, — диэн Сергей Местников эттэ.
Петр Яковлев сэриигэ алта сылы быһа сылдьыбыта. 1950 сыллаахха дойдутугар кэлэн баран, Ленинградтааҕы университекка үөрэммитэ. Кини Сунтаардааҕы ССКП райкомугар, «Элгээйи» сопхуос парткомун сэкиритээринэн, САССР Миниистирдэрин сэбиэтин инструкторынан, о.д.а. 70 сааһын ааһыар диэри үтүө суобастаахтык үлэлээбитэ.
Кэргэнэ Ирина Николаевналыын түөрт оҕону төрөтөн, иитэн-улаатыннартаан, атахтарыгар туруорбуттара. Кэргэнэ 2013 сыллаахха суох буолбута. Билигин тоҕус сиэннээх, сэттэ хос сиэннээх дьоллоох эһээ буолар.
Петр Константинович быйыл 99 сааһын туолар, билигин да көхтөөх, сэргэх, уопсастыбаннай олоххо кыттыһар, куорат бэтэрээннэрин сэбиэтин чилиэнэ. Хаһыаттары ааҕар, тэлэбиисэри көрөр буолан, сонуннары истэ-билэ олорор.
Саха сирэ “Дьоҕус уонна орто биисинэс уонна урбаанньыт тус көҕүлээһинин өйөөһүн” национальнай бырайыакка 2019 сылтан…
Сана үйэҕэ эргиэн үлэтигэр саҥа саҕалааһыннар кэрэхсэбиллээхтэр. Урукку кэмҥэ атыы-тутуу, эргиэн эйгэтигэр "Холбос" биир тэрилтэтэ…
«Оҕо аймаҕы үрдүккэ, сырдыкка, төрөөбүт дойдуга бэриниилээх буоларга сирдээбит "Мэлдьи бэлэм буол!" диэн тумус тыллаах…
Ыам ыйын 15 күнүгэр Дьиэ кэргэн аан дойдутааҕы күнүн бэлиэтээтибит. Онон бүгүн айанньыт, орнитолог, фотограф,…
Нам улууһугар Арбын уонна Түбэ сэлиэнньэлэрин икки ардыларыгар муус дьапталҕатын эстэрии ыытыллыбыта түмүктэри аҕалла. Онно…
Психолог сүбэтэ Ксения Ивашковская – Психоневрология өрөспүүбүлүкэтээҕи диспансерын килиниичэскэй психолога, дьиэ кэргэн психолога, консультант,…