Бэтэрээн — үүнэр көлүөнэҕэ настаабынньык

«Аҕа дойдуну көмүскээччилэр» пуонда көмөтүнэн, байыаннай эпэрээссийэ бэтэрээннэрэ оҕолору уонна ыччаты патриотическай иитиигэ көхтөөхтүк кытталлар. Бу үлэҕэ бастакы, ол эрээри эрэллээх хардыыларын оҥорор  байыаннай эпэрээссийэ бэтэрээннэриттэн биирдэстэринэн Герасим Ксенофонтов буолар диэн пуонда Саха сиринээҕи салаата иһитиннэрэр.

Герасим оҕо эрдэҕиттэн байыаннай сулууспалаах буолар баҕалаах этэ. Мобилизация иннинэ Дьокуускайга рестораҥҥа  үлэлээбитэ,  байыаннай эпэрээссийэ саҕаланарыгар баҕа өттүнэн мобилизацияҕа сайабылыанньа биэрбитэ. Бойобуой зонаҕа бастакы күннэриттэн бэйэтин бэрээдэктээх, көхтөөх, хорсун саллаат быһыытынан көрдөрөн, хамандыырдарын уонна табаарыстарын ытыктабылларын ылбыта.

Бойобуой сорудах кэмигэр ыараханнык бааһырбыта, ол түмүгэр, атаҕын быспыттара. Хорсунун иһин «Буойун килбиэнин иһин» уонна «Анал байыаннай эпэрээссийэ кыттыылааҕа» мэтээллэринэн наҕараадаламмыта.

Судаарыстыбаннай пуондаҕа этэллэринэн, бу эчэйиититтэн кини санаатын түһэрбэтэҕэ. Ыарахан реабилитацияны ааһан баран, Герасим сэрии кэминээҕи уопутун уонна тулуурун уопсастыбаҕа сулууспалыырга туһанарга бигэ быһаарыыны ылыммыта, саҥа суолу – эдэр көлүөнэни үөрэтиини талбыта.

Чугас дьонун өйөбүллэрэ Герасимҥа уһун болдьохтоох эмтэниигэ уонна реабилитацияҕа көмөлөспүтэ; дьиэтигэр төннөн кэлбитигэр, кэргэнэ уонна оҕолоро өйөбүл, тирэх буолбуттара. Демобилизация кэнниттэн бойобуой бэтэрээн судаарыстыбаннай пуонда салаатын кытта сибээстэспитэ, онно киниэхэ социальнай координаторынан Полина Дедюкинаны анаабыттара. Бары өттүнэн өйөбүлү ылан, билигин уопсастыбаннай үлэҕэ көхтөөхтүк кыттар.

Герасим Андреевич нэһилиэнньэҕэ үлэтин 15 уһуйаан кыттыбыт «Славим Героев Отечества!» куораттааҕы онлайн-куонкуруска дьүүлүүр сүбэҕэ кыттыыттан саҕалаата.

Иккис бэлиэ түгэнинэн өрөспүүбүлүкэ Үрдүкү муусука оскуолатын устудьуоннарын кытта үөрүүлээх көрсүһүү буолла. Көрсүһүүгэ Герасим Андреевич эдэр музыканнарга олоҕун, сулууспатын, тургутууларын туһунан кэпсээтэ. Ыарахан кэмнэргэ сэриилэһэр табаарыстарын хорсун санаалара, тулуурдара, бэриниилээх буолуулара өйөөбүтүн тоһоҕолоон эттэ уонна үүнэр көлүөнэҕэ билиигэ-көрүүгэ дьулуһалларыгар, эйэлээх олоҕу сыаналыылларыгар, бигэ ис туруктаах буолууну иитэллэригэр баҕарда.

Тэрийээччилэр этэллэринэн, кэпсэтии кэмигэр долгутуулаах түгэнинэн иккис кылаас үөрэнээччилэрэ ыалдьыкка анаан  бэлэмнээбит хоһооннорун ааҕыы буолла. «Оҕолору кытта алтыһарбын, ыйытыыларыгар хоруйдуурбун сөбүлүүбүн», — диэн Герасим Ксенофонтов санаатын үллэһиннэ.

Өссө биир улахан суолталаах түгэнинэн Герасим Андреевич Уокка сиэтиини, үлүйүүнү эмтиир киин үлэһиттэрин кытта көрсүһүүтэ буолар. Кини эчэйиини эмтииргэ тус уопутун үллэһиннэ,  анал байыаннай дьайыы зонатыгар байыаннай миэдиктэр үлэлэрин туһунан кэпсээтэ, быраастар уонна сиэстэрэлэр туохха да сыаналаммат оруолларын тоһоҕолоон бэлиэтээтэ.

Герасим Ксенофонтов кэпсээнэ киһи итэҕэйиэ суох күүстээх. Ыарахан тургутуулары, чөлгө түһүүгэ сүрдээх  ыарахан суолу туораан, олоххо эргиллэн эрэ буолбакка, саҥа, суолталаах сыалы-соругу булбута. Билигин Герасим инникигэ дьулуһар. Кини идэтинэн бэйэтин суолун буларга дьулуһар уонна уопсастыбаҕа сулууспалааһыны сүрүн сыалынан ааҕар. Кини сыала-соруга үүнэр көлүөнэҕэ үйэлээх сыаннастары тиэрдии: хорсун быһыыны, бэриниилээх буолууну уонна Аҕа дойдуга тапталы.