Бэтэрээннэр ортолоругар мас тардыһыыга аан дойду чөмпүйэнээтигэр аатырбыт саха спортсменнара кыттыахтара

Грузияҕа бэтэрээннэр ортолоругар мас тардыһыыга аан дойдутааҕы чөмпүйэнээтэ ыытыллыаҕа.

Улахан күрэхтэһиигэ Саха сириттэн аатырбыт спортсменнар, олор ортолоругар өрөспүүбүлүкэ абсолютнай чөмпүйүөннэрэ кыттыахтара. Арассыыйа сүүмэрдэммит хамаандатын састаабыгар барыта 24 спортсмен киирдэ.

Аан дойду чөмпүйэнээтэ муус устар 26 күнүгэр Цхалтубо куоракка ыытыллар. Эр дьон-бэтэрээннэр 65 кг, 75 кг, 85 кг, 95 кг, 95 кг үөһэ, оттон дьахталлар-бэтэрээннэр 60 кг, 65 кг, 75 кг, 75 кг үөһэ ыйааһыннарга киирсиэхтэрэ.

Арассыыйа сүүмэрдэммит хамаандатын састаабыгар мас тардыһыыга Саха сириттэн 15 спортсмен киирдэ. Олор ортолоругар аатырбыт чөмпүйүөннэр Анатолий Баишев (95+ кг), Федор Федоров (95 кг), Анатолий Гладков (75 кг), Татьяна Дьячковская (60 кг), Туяра Орлова (75 кг), Валентина Шестакова (60 кг) уонна Яна Захарова (75 кг) бааллар.

Ону тэҥэ ааттаах-суоллаах Саха сирин мадьынылара: Алексей Анисимов (85 кг), Игорь Филиппов (65 кг), Андриан Харитонов (75 кг), Мерсиаз Пахомов (85 кг), Максим Шкулев (95 кг), Гаврил Сивцев (75 кг), Василий Свинобоев (65 кг), Дмитрий Сергучев (65 кг). Маны таһынан дойду сүүмэрдэммит хамаандатыгар Арассыыйа атын эрэгийиэннэрин бэрэстэбиитэллэрэ кыттыахтара. Хамаанда састаабыгар уларыйыылар киириэхтэрин сөп.

Санаттахха, Аан дойду чөмпүйэнээтин сэргэ эр дьон уонна дьахталлар ортолоругар Европаҕа чөмпүйэнээт ыытыллар, ону кытта уолаттар ортолоругар первенство.