Бэтэрээннэргэ анаан Реабилитационнай киини тутар былааннаахтар

Үп министиэристибэтэ «Саха сирэ — Дьоруойдар дойдулара» бырайыагынан стажировкаланар дьону үлэлэтэн эрэр.  Министиэристибэҕэ «Хорсунун иһин» уордьан кавалера Назар Петров уонна «Хорсунун иһин» мэтээлинэн наҕараадаламмыт, билигин үп миниистирин солбуйааччы дуоһунаһыгар олорор Леонид Александров стажировкаларын саҕалаатылар.

Назар Петров бырайыак чэрчитинэн улахан суолталаах хайысханы олоххо киллэриини саҕалаата — байыаннай дьайыы кыттыылаахтарыгар уонна атын байыаннай эпэрээссийэлэр бэтэрээннэригэр анал Реабилитационнай киин тутуутун туһунан этиини киллэрдэ.

«Саха сирэ — Дьоруойдар дойдулара» каадыр бырагырааматын олоххо киллэрии бүтүн өрөспүүбүлүкэҕэ улахан суолталаах. Бырабыыталыстыба уорганнарыгар  сулууспалыырга суолу арыйар. Үп министиэристибэтигэр үс нэдиэлэ устата стажировкаланан, анал эпэрээссийэ кыттыылаахтарыгар аналлаах реабилитационнай киин тутуутун бырайыагын оҥорууга үп, доруобуйа харыстабылын уонна үлэ министиэристибэтин исписэлиистэрин кытта үлэлэһиэм», — диэтэ Назар Петров.

Бастакы көҕүлээһин – Херсон уонна Запорожье куораттар балыыһаларыгар мэдиссиинискэй эпэрээссийэлиир бөлөхтөрү (хирург, анестезиолог-реаниматолог, эпэрээссийэлиир сиэстэрэ) ыытыы. Иккиһэ – байыаннай дьайыы  кыттыылаахтара наадыйаларын учуоттуур туспа Реабилитационнай киини тутуу.

Үп миниистирин эбээһинэһин толорооччу Иван Алексеев практикант көҕүлээһинин өйөөн, солбуйааччыларыгар бырайыагы олоххо киллэриигэ бырайыагын оҥорорго сорудахтаата. Үп министиэристибэтэ доруобуйа харыстабылын  уонна үлэ, социальнай сайдыы министиэристибэлэрин исписэлиистэрин кытыннаран, биэдэмистибэлэр икки ардыларынааҕы холбоһуктаах хамыыһыйаны тэрийэр туһунан суруктары эрдэттэн таһаарбыта.

Этии оҥоһуллуутун кэнниттэн бырайыагы Ил Дархан Айсен Николаев көрүүтүгэр киллэрии былааннанар.

Үп миниистирин эбээһинэһин толорооччу Иван Алексеев стажердары эҕэрдэлээтэ. Байыаннай дьайыы бэтэрээннэрэ бырабыыталыстыба уорганнарын үлэлэригэр кыттыылара улахан суолталааҕын тоһоҕолоото уонна кинилэр билиилэрэ,  уопуттара салааны сайыннарыыга сыаналаах кылаат буолуохтара диэн эрэнэрин эттэ.

Леонид Александров салайар хайысхаларыгар: ОДьКХ, тырааныспар, тутуу, гражданскай оборуона уонна  куттала суох буолууну хааччыйыы, урбаан, дьарыктаах буолуу, инвестиционнай бүддьүөт хайысхаларыгар эбэһээтэлистибэлэрин салгыы толорор. Кини өссө судаарыстыбаннай иэс, инвестиция уонна оҥорон таһаарыы салаатын департаменнарын үлэтин хонтуруоллуур.

Сиһилии: https://www.sakha.gov.ru/news/8978