Бэтэрээннэргэ — ураты бэлэх

Бу күннэргэ А.Е. Кулаковскай-Өксөкүлээх Өлөксөй аатынан норуоттар доҕордоһууларын дьиэтэ Арассыыйа норуоттарын дьиэтэ тэрийэр Бүтүн Арассыыйатааҕы “Бэтэрээҥҥэ ыалдьыттыыбыт” аахсыйаҕа кыттар.

Муус устар 10 күнүттэн ыам ыйын 10 күнүгэр диэри дойду үрдүнэн эйэлээх халлааны бэлэхтээбит дьоҥҥо истиҥ махтал тыллары этэллэр.

Тэрээһин кыттыылаахтара биир ый устата Аҕа дойду сэриитин  уонна тыыл бэтэрээннэригэр, Ленинград блокадатыттан тыыннаах хаалбыттарга, сэрии оҕолоругар сылдьыахтара. Кинилэр хас биирдии дьоруойга астаах-үөлээх бэлэх ууналлар. Манна Саха сирин минньигэс отонун барыанньата уонна “Сказки Туймаады” кэмпиэт, Татарстан чак-чак минньигэһэ, Белоруссия сыата уонна зефирэ, Узбекистан эриэхэтэ, Азербайджан чэйэ, Башкирия мүөтэ уо.д. а. ас арааһа баар.

Быһата,  Саха сиригэр олорор элбэх омук дьонун тапталынан, махталынан уонна сомоҕолоһуутунан  угуттаммыт ураты бэлэх.

Маннык күндү бэлэҕи бэтэрээннэргэ дьиэлэригэр тиийэн туттараллар.