Бэтэринээринэй тэрилтэлэри бөҕөргөтүөхтэрэ

Өрөспүүбүлүкэҕэ 2024-2028 сс. судаарыстыбаннай бэтэринээринэй тэрилтэлэр материальнай-техническэй баазаларын бөҕөргөтүүгэ үлэ ыытыллыа.

Бэтэринээринэй сулууспа сайдыытын былаанын туһунан СӨ Бырабыыталыстыбатын бэрэссэдээтэлин солбуйааччы Сергей Местниковка буолбут мунньахха дьүүллэстилэр. Кини Ил Дархан Айсен Николаев олохтоох оҥорон таһаарааччылар нэһилиэнньэни хаачыстыбалаах бородууксуйаларынан хааччыйалларын туһуттан, өрөспүүбүлүкэ бэтэринээринэй сулууспаларын үлэлэрин күүһүрдэргэ сыал-сорук туруорбутун бэлиэтээтэ.

Бырагыраама бырайыагар бэтэринээрдэр үлэлиир дьиэлэрин тутуу уонна хапытаалынай өрөмүөн, тырааныспары, лабораторияҕа наадалаах уонна дезинфекциялыырга туттуллар тэриллэри атыылаһыы көрүллүбүт. Бырагырааманы оҥорооччулар этэллэринэн, бырайыакка көрүллүбүт тэрээһиннэри олоххо киллэрии — бэтэринээрдэр өҥөнү оҥорууларын, лабораторнай чинчийиилэр чопчу анаалыстары оҥорууларын үрдэтэри, лабораторияҕа чинчийии арааһын кэҥэтэри хааччыйар.

Санатан эттэххэ, Саха сиригэр Ил Дархан Айсен Николаев сорудаҕынан 2022 сыллаахха судаарыстыбаннай бэтэринээринэй сулууспа 2030  сылга диэри сайдыытын стратегията ырытыллыбыт, оҥоһуллубут.

Сиһилии https://www.sakha.gov.ru/news/front/view/id/3383543 манна ааҕыҥ.

СӨ Ил Дарханын уонна Бырабыыталыстыбатын пресс-сулууспата