Бетон билиитэтигэр баттаппыт оҕолор доруобуйаларын туругун туһунан иһитиннэрдилэр

Бэҕэһээ, балаҕан ыйын 19 күнүгэр, Дьокуускайга Автодорожнай уулуссаҕа бетон билиитэ оҕолор үрдүлэригэр сууллубута. Оҕолору Мэдиссиинэ национальнай киинини педиатрическай киинигэр киллэрбиттэрэ. Кинилэри быраастар көрөллөр-истэллэр диэн СӨ Доруобуйа харыстабылыгар министиэристибэтэ иһитиннэрэр.

Бүгүн икки оҕо доруобуйатын туруга биир тэҥин туһунан быраастар иһитиннэрдилэр. Үһүс оҕо ыарахан туруктаах реанимацияҕа эпэрээссийэлэнэн сытар.

Санатан суруйдахха, бэҕэһээ Дьокуускайга Автодорожнай уулусса 40/9 №-дээх дьиэтин аттыгар оҕолорго бетон билиитэ сууллубута. ЫБММ чопчулаабыт информациятынан, быһылаан түмүгэр тоҕус саастаах кыыс суорума суолламмыта. Оттон 5 саастаах уол уонна 7 саастаах икки кыыс араас эчэйиилэри ылан балыыһаҕа киллэриллибиттэрэ.