Бибилэтиэкэ бастыҥ ааҕааччыларын эҕэрдэлээтэ

Тумулга оскуолабыт Саҥа дьыла өрө көтөҕүллүүлээхтик ыытылынна.

Бырааһынньыктыы симэммит харыйа тула ыытыллыбыт үөрүүлээх чааска үөрэх бастыҥнара, быйылгы сыл көхтөөх кыттааччылара, араас күрэстэр лауреаттара чиэстэннилэр.

А.Р.Халдеева аатынан модельнай бибилэтиэкэ бу үөрүүлээх күн бастыҥ ааҕааччыларыгар сэртипикээттэри, бэлэхтэри туттарда.

Ол курдук, алын сүһүөх кылаастарга «Лучший читающий класс» үрдүк аатын орто оскуола үһүс кылааһа ылла. Орто сүһүөх кылаастарга эгил-тэгил тардыалаһыы кэнниттэн, «Самый активный класс» диэн чиэстээх-бочуоттаах аат ахсыс кылаас кэлэктиибигэр туттарылынна. Үрдүкү кылаастарга «Самый творческий класс» диэн үрдүк ааты 11 кылаастар ылан үөрүү-көтүү өрөгөйө буолла. Онтон «Лучший читатель 2024 года » аат үһүс кылаас үөрэнээччитигэр Лексекуна Амелияҕа туттарылынна.

Үөрүүлээх чааска Халдеевтар, Алексеевтар, Дьячковскайдар аймах, улууска бибилэтиэкэ төрүттэммитэ 100 сыллаах үбүлүөйүнэн, А.Р.Халдеева аатынан нэһилиэк бибилэтиэкэтигэр 30000 солк. суумалаах сэртипикээти дохсун ытыс тыаһыгар доҕуһуоллатан туттардылар.

Светлана Прудецкая,

Тумул.

Хаартыскалар ааптар тиксэриилэрэ