Бибилэтиэкэлэргэ аналлаах оҥоһуу өй көмөтүнэн бастакы сервис оҥоһулунна

Арктикатааҕы судаарыстыбаннай култуура уонна  искусство института дойду үрдүнэн бибилиэтиэкэлэри сыыппараҕа киллэрэргэ аналлаах оҥоһуу өйгө олоҕурбут бастакы сервиһи оҥорон таһаарда. Бу туһунан «Социоцентр» ФГАНУ пресс-сулууспата иһитиннэрдэ.

Бырайыак РФ Үөрэҕин уонна билимин министиэристибэтин «Приоритет-2030» бырагырааматын чэрчитинэн («Ыччат уонна оҕо» национальнай бырайыак) олоххо киирэр. «Билигин АСКИИ Саха сиринээҕи Национальнай бибилиэтикэнэи кытта тэҥҥэ дойду үрдүнэн бибилэтиэкэлэри сыыппараҕа киллэрэргэ аналлаах оҥоһуу өйгө олоҕурбут бастакы сервиһи айан оҥорор. Саҥа сервис докумуоннары тупсаран оҥоруу уонна көрдөөһүн ньымаларын, ону таһынан бибилэтиэкэ бүтүн тутулун тосту уларытыахтаах. Оҥоһуу өй бырагырааматын үс муодула номнуо оҥоһулунна: ол курдук, автоматическай каталогизация, виртуальнай көмөлөһөөччү уонна тиэкиһи кытта үлэ», — диэн пресс-сулууспаҕа кэпсээтилэр.

АСКИИ Оҥоһуу өй киинин салайааччыта Тимур Алексеев чуолкайдаабытынан, Бурятиятааҕы судаарыстыбаннай тыа хаһаайыстыбатын академиятын Научнай бибилиэтикэтин кытта тэҥҥэ муодул быраактыкаҕа пилотнай тургутуутун түһүмэҕэ саҕаланна.

«Туһанааччылартан бастакы санаалар киирдилэр, олорго олоҕуран каталогизациялыыр алгоритмнар чопчуларын үрдэтэр уонна дааннайдары киллэриигэ табыгастаах оҥорор соруктаах хас да теэхиниичэскэй уонна интерфейсын тупсарыылар киллэрилиннилэр», — диэн кини бэлиэтээтэ. Кини этэринэн, оҥоһуллубут сервис көрүҥэ RUSMARC форматыгар библиографическай суруйуулары автоматизированнайдык бэлэмниир сүрүн кыахтарын киллэрэр.

АСКИИ «Арктика култуурунай куода: нэһилиэстибэни харыстаан, технологическай сарсыҥҥыны түстээн» диэн стратегическай технологическай бырайыагы олоххо киллэрэр. Бырагыраама сыала-соруга — Арктика норуоттарын сүрүн сыаннастарыгар уонна олоххо көрүүлэригэр олоҕуран, култуура уонна креативнай индустриялар эйгэлэригэр инновационнай бородуукталары уонна технологиялары айыы-тутуу буолар.