Бибилэтиэкэрдэр оҕо тыйаатырдарын салайаллар

Ахсынньы 5 «Книжки и маски» диэн ХI оҕо тыйаатыр кэлэктииптэрин бэстибээлэ уон биирис төгүлүн ыытылынна. Бэстибээл Кыайыы 80 сылыгар ананна.

Хаартыска: А.Васильева.

Анастасия Дмитриева, Дьокуускай бибилэтиэкэлэрин кииннэммит ситимин методиһа:

— Мин быйыл бу бэстибээлгэ бастакыбын тэрийээччи быһыытынан үлэлээтим. Барыта кыраттан саҕаламмыта, уонча сыллааҕыта биир-икки филиалга эрэ «кинигэ тыйаатыра» диэн баара. Бу хамсааһын кэҥээн, билигин 12 филиалга баар буолла. «Кинигэ тыйаатырдарын» бибилэтиэкэрдэр салайаллар: бэйэлэрэ сценаристар, режиссердар, звукорежиссердар, костюмердар, о.д.а.

«Смарт» бибилэтиэкэ иһинэн үлэлиир «Турук» этно-тыйаатыр салайааччыта Саргылаана Горохова режиссер идэлээх буолан, бибилэтиэкэҕэ ол хайысханан дьарыктанар, оттон оҕолорун талан ылар. Онон киниэхэ 7 сыл дьарыктаммыт оҕолор кытта  бааллар, киинэҕэ эҥин уһуллаллар. «Артыыс буолабын» диэн сыаллаах оҕолор сылдьаллар. Атын тыйаатырдарбыт оскуолалары кытта үлэлэһэллэр, эбэтэр, баҕалаах оҕолору түмэллэр.

Бэстибээл быйылгы уратыта — быйыл грант сүүйэммит, «кинигэ тыйаатырдарын» салайааччыларын анал куурустарга үөрэтэн, маастар-кылаастары ыыттаран, бэлэмнээтибит, таһымнарын үрдэттибит. Кинилэр анал үөрэҕэ суохтар, сүрэхтэрин баҕатынан, үлэлииллэр. Маны тэҥэ, грант көмөтүнэн, методичкалары бэлэмнээтибит. Хайдах эрэпэтииссийэлэри, дьарыктары ыытарга, куолаһы, пластиканы эрчийэргэ, о.д.а. сүбэлэр бааллар.

«Кинигэ тыйаатырдарын» сыаллара-соруктара наһаа дириҥ. Оҕолорго кинигэни аах диэтэххэ, ис хоһоонугар үчүгэйдик киирбэттэр, өйдөөбөттөр, онтон бэйэлэрэ оонньоон көрдөхтөрүнэ, оруолга киирэннэр, букатын атын буолар, дириҥник ылыналлар. Оҕолор наһаа баҕаран, астынан сылдьаллар. Төрөппүттэрэ эмиэ баҕалаахтар, өрүү көмөлөһөллөр. Маны тэҥэ, биһигини куруук өйүүр Саха тыйаатырыгар махтанабыт.