Биэни бөрө диэн ыппыттар?

Мэҥэ Хаҥаласка сүппүт биэ өлүгэ булуллубут, уорбаланааччылар быһаарыллыбыттар.

2024  сыллаахха ахсынньыга Мэҥэ Хаҥаласка олорор 60 саастаах киһи ИДьМ улуустааҕы отделыгар сайабылыанньа суруйан киллэрбит. Кини биэтин сүтэрбит уонна төбөтүн, туйахтарын Хаптаҕай с. таһыттан булбут.

Кини манна кыыл-сүөл буолбакка, дьон буруйдааҕын тута билбит.

Биэнсийэлээх сайабылыанньатынан РФ ХК 158 ыст. 2 ч. «Уоруу» диэнинэн холуобунай дьыала тэриллибит. Буруйдаахтары буларга сорудах холуобунай ирдэбил үлэһиттэригэр бэриллибит.

Суһал-ирдиир үлэ ыытыллыбытын түмүгэр, ити күннэргэ Хаптаҕай диэки сылдьыбыт куорат дьонугар полиция үлэһиттэрэ тахсыбыттар. Кимнээҕин быһаарбыттара 46 саастаах урбаанньыт уонна 57 саастаах тэрилтэ дириэктэрэ буолан биэрбиттэр.

Уорбаланааччылар эппиттэринэн, ити күннэргэ кинилэр бөрөнү бултуу тахсыбыттар уонна биэни алҕас ыппыттар. Бөрөнү бултуурга көҥүллээхтэр эбит.

Ол гынан баран, бу эр дьон алҕаһаабыттарын көннөрөргө холоммотохтор, буруйдарын билиммэттэр, силиэстийэ кэмигэр сайабылыанньалаахха хоромньутун толуйар туһунан этии кинилэртэн киирбэтэх. Маны тэҥэ, бөрөнү ыттыбыт дии санаабыт сирдэригэр кэлэн биэ өлөн сытарын көрөн баран, кинилэртэн биирдэстэрэ эти дьиикэй кыыллар уонна ыттар тырыта тыытан сиэхтэрэ диэн, бэйэтин ытыгар ылбыт.

Силиэстийэ буолбут быһыыны-майгыны барытын быһаарар.

СӨ ИДьМ пресс-сулууспата