Биэнсийэ орто кээмэйэ 25 тыһ.солк. куоһарда

От ыйын 1 күнүнээҕи туругунан Арассыыйа үрдүнэн биэнсийэ орто кээмэйэ  25 тыһ.солк. куоһарда.

Бу туһунан РИА Новости Социальнай пуонда дааннайдарыгар олоҕуран иһитиннэрэр. Биэнсийэ орто кээмэйэ ыйга 25 098 солк. буолбута чопчуланар.

Социальнай пуонда чахчыларыттан көстөрүнэн, үлэлиир биэнсийэлээхтэр орто биэнсийэлэрин кээмэйэ – 22,1 тыһыынча солкуобай, оттон үлэлээбэттэр киэнэ – 25,8 тыһыынча солкуобай буолбут.

Бу иннинэ Судаарыстыбаннай Дуума дьоҕус уонна орто урбааҥҥа кэмитиэтин чилиэнэ Алексей Говырин дойду үрдүнэн биэнсийэ орто кээмэйэ ыйга 23 448 солкуобайга тэҥнэһэрин туһунан иһитиннэрбитэ.

Ону таһынан, дьокутаат дойдуга байыаннай биэнсийэ орто кээмэйин төһө буоларын иһитиннэрдэ. Ол курдук, быйыл байыаннай биэнсийэ орто кээмэйэ ыйга 43-45 тыһ. солк.кэриҥэ буолар.