Биэнсийэ төлөбүрүн ааҕар саҥа ньыманы олохтуурга этии көтөхтүлэр

Биэнсийэлээххэ  тиийинэн олоруу алын кээмэйэ хамнас алын кээмэйигэр (МРОТ) тэҥнэһиэхтээх. Маннык көҕүлээһини Судаарыстыбаннай Дуумаҕа «Сиэрдээх Арассыыйа — Кырдьык иһин» баартыйа бэрэссэдээтэлэ Сергей Миронов киллэрдэ.

«Бу үлэлиир дьон уонна биэнсийэлээхтэр материальнай өттүнэн хааччыллыыларын таһымыгар төрүөтэ суох улахан араастаһыыны үөскэтэрэ чахчы», — диэн Сергей Миронов эттэ. Бу туһунан ТАСС иһитиннэрэр.

Дьокутаат этэринэн, тохсунньу 1 күнүттэн МРОТ 22 440 солкуобай буолар. Ол кэмҥэ, биэнсийэлээх тиийинэн олоруу алын кээмэйэ Москваҕа — 17 897 солк., Москва уобалаһыгар — 16 600, Санкт-Петербурга — 16 623, оттон Кировскай уобаласка — 13 573 солкуобайга тэҥнэһэр.

Миронов санаатынан, бу сокуон барыла ылылыннаҕына, аҕам саастаах дьон олоҕун хаачыстыбата тупсуоҕа уонна биэнсийэ алын кээмэйин быһаарар төрүөт олохтонуоҕа.

Бу иннинэ, премьер-миниистир Михаил Мишустин иһитиннэрбитинэн, 2026 сыл тохсунньу 1 күнүттэн Арассыыйаҕа хамнас алын кээмэйэ 20%-тан тахса үрдээн, 27 093 солк. буолуоҕа.