Биэнсийэ төлөбүрүн хайдах үрдэтэбит?

Госдуумаҕа Үлэҕэ, социальнай бэлиитикэҕэ уонна бэтэрээннэр дьыалаларын кэмитиэтин чилиэнэ Светлана Бессараб ТАСС-ка иһитиннэрбитинэн, биэнсийэ анаммыт кэмиттэн 10 сыл хойут тахсар гражданнар биэнсийэлэрин төлөбүрэ икки төгүл үрдүөн сөп.

Дьокутаат быһаарбытынан, өскөтүн гражданин биэнсийэ сааһа кэлбитин кэннэ өссө биэс сыл үлэлиир буоллаҕына, кини тус биэнсийэтин  коэффициенын кээмэйэ 36 % үрдүөн сөп, оттон төлөбүр – 45 %. Оттон биэнсийэҕэ тахсыыны 10 сылга хойутаттахха, биэнсийэ икки төгүл үрдүөҕэ.

Кини чопчулаабытынан, 10 сылга биэнсийэҕэ тахсыыны хойутаттахха, тус биэнсийэ коэффициеннара 2,32 төгүл, оттон сүрүн чааһа – 2,11 төгүл индексацияланыахтара. Ону таһынан, хойутатыы кэмигэр эбии бааллар суоттаныахтара.

Бессараб бэлиэтээбитинэн, хас биирдии киһи бэйэтигэр ханнык ньыма ордук барыстааҕын сыаналыахтаах: биэнсийэни уонна хамнаһы тэҥҥэ ылыы, ол эрээри кыра кээмэйинэн, эбэтэр биэнсийэни ылыыны хойутатан, тахсыы кэмигэр быдан улахан сууманы ылыы.