Хаартыска: СИА
Соторутааҕыта биир биллэр саайтка “2024 сылга биэнсийэҕэ тахсар саас 3 сылынан эбиллиэ” диэн суруйуу тахсыбыта. Ол суруйуу ситиминэн тарҕанан, аймалҕаны тарта.
Чахчы, киһи эрэ дьиксиниэх курдук. Биэнсийэ реформата – биэнсийэҕэ тахсар сааһы уһатыы 2019 сыллаахха буолбута, Арассыыйа олохтоохторугар барыларыгар 5 сылынан уһаан биэрбитэ. Онуоха биэнсийэҕэ бу тахсаары сылдьар дьон оҕустарбыттара чахчы. Барыллаан ааҕыынан, кинилэр 5 сыл устата мөлүйүөн кэриҥэ үптэрин сүтэрэллэр. Ол онтон өрүттэ да иликтэн, аны өссө 3 сыл уһаталлар диэн сурах кэлбитэ төһө үчүгэй буолуой? Дьон дьиксинэрэ, айманара да сөптөөх курдук.
“Социальнай пуонда пресс-сулууспата иһитиннэрбитинэн, 2024 сылга биэнсийэҕэ тахсыы сааһа 3 сылынан үрдүөҕэ. Бочуоттаах сынньалаҥҥа 63 саастарын туолбут эр дьон уонна 58 саастарын туолбут дьахталлар тахсыахтара”, — диэн суруйууга этиллэр.
Дьэ, бу төһө оруннаах иһитиннэрииний? Ону билээри, Социальнай пуонда Саха сиринээҕи салаатыттан ыйыталастыбыт.
“Оруна суох суруйуу”
Социальнай пуонда Саха сиринээҕи салаатын биэнсийэни олохтооһун управлениетын начаалынньыга Надежда Данилова бу курдук эппиэттээтэ:
— Уһук Хоту оройуоннарыгар үлэлээбит дьоҥҥо биэнсийэ ананыытыгар сааһынан ирдэбиллэри табылыыссаттан көрүөххүтүн сөп.
2023 сылга биэнсийэҕэ тахсар саас, 2018 сылы кытта тэҥнээтэххэ, номнуо 5 сыл уһаабыта. Ону 400 №-дээх федеральнай сокуон 6-с сыһыарыытыгар көрүөххүтүн сөп. Элбэх оҕолоох уонна икки оҕолоох ийэлэргэ (хотугу ыстаастара 12 сылтан итэҕэһэ суох буоллаҕына) уонна анал испииһэгинэн биэнсийэҕэ тахсар дьоҥҥо бу биэнсийэ сааһын үрдэтии таарыйбат. Онон бу суруйуу оруна суох.
Исписэлиис этиитигэр эбэн эттэххэ, үөһэ ыйыллыбыт суруйууга Арассыыйа дааннайдарын аҕалбыттар, ол Саха сиригэр сыһыана суох. Саха сиригэр дьахталлар 50 уонна 55 саастарыгар, эр дьон 60 саастарыгар биэнсийэҕэ тахсаллар, эбии сааһы үрдэтии буолбат.
Хаҥалас улууһун 1-кы Малдьаҕар нэһилиэгин олохтоохторо ааспыт өрөбүллэргэ бэлиэтэммит "Нэһилиэк күнүгэр" бэртээхэй сонуну истэн үөрдүлэр.…
Бу күннэргэ Амма улууһун баһылыга Степан Кузьмин кыстыкка киириигэ бэлэмнэнии чэрчитинэн улуус киинин хочуолунайдарын туруктарын…
Таатта Харбалааҕар Аҕа дойду Улуу сэриитигэр кыайыы 80 сыллаах үбүлүөйүн көрсө бэлэмнэнии үлэ саҕаланна. "Дьоһуннааҕы…
Бүгүн СӨ Урбааҥҥа, атыыга-эргиэҥҥэ уонна туризмҥа миниистирэ Тимур Ханды министиэристибэ үлэһиттэригэр «Туризмы сайыннарыы уонна территориальнай…
Балаҕан ыйын 14 күнүгэр "Мукучу нэһилиэгэ" МТ баһылыга Николай Иванович Левин, "Сарыал" түөлбэ салайааччыта Анна…
Нам улууһун баһылыга Юрий Слепцов анал дьаһалынан улуус социальнай-экэнэмиичэскэй сайдыытын пуондатын бырабылыанньата халаан уутуттан эмсэҕэлээбит…