Биэнсийэлээх дьахтар 2729 пачка табаҕы атыыласпыт

Кэбээйи оройуоннааҕы суута Сангаар бөһүөлэгин олохтооҕун — биэнсийэлээх дьахтары маркировката суох элбэх табаҕы атыылаһыыга уонна ону атыылыыр сыаллаах харайыыга буруйдааҕынан билиннэ диэн СӨ Сууттарын пресс-сулууспата иһитиннэрэр.

Быһаарыллыбытынан, дьахтар Челябинскай уобалас Копейскай куоратын ырыынагыттан 2729 пачка маркировката суох табаҕы 324 751 солк. атыыласпыт. Бэрэбиэркэ кэмигэр табахтары маҕаһыынтан булбуттар, дьахтар 50 пачканы атыылаабыт.

Суукка дьахтар буруйун билиммэтэх, табаҕы атыыга буолбакка, бэйэтигэр анаан атыыласпытын эппит.

Суут дьахтар сааһын, эрдэ буруйу оҥорботоҕун, доруобуйатын туругун болҕомтоҕо ылан, 100 тыһ.солк. ыстарааптыырга анаабыт.

Бириигэбэр сокуоннай күүһүгэр киирэ илик.