Биэнсийэлээх дьахтар 300 тыһ.солк. ыстарааптанна

Дьокуускайга олорор биэнсийэлээх дьахтар сир учаастагын  бөҕүнэн-саҕынан толорбутун иһин, 300 тыһыынча солкуобай суумалаах ыстараабы төлүөҕэ. Бу быһаарыыны суут Экологияҕа, айылҕаны туһаныыга уонна ойуур хаһаайыстыбатыгар министиэристибэтин кытта сууттаһыы кэнниттэн ылыммыта. Министиэристибэ Хатыҥ Үрэххэ баар 1250 кв.м иэннээх учаастакка  көҥүлэ суох сыбаалканы булбут. Бу туһунан СӨ Үрдүкү суутун пресс-сулууспата иһитиннэрэр.

Дьокуускайдааҕы судаарыстыбаннай экологическай хонтуруол бэрэбиэркэтинэн, 2023 сыл бэс ыйыгар бу  учаастак дьиэни көтүрүү бөҕүнэн, тимир, бетон үлтүркэйинэн, о.д.а. туолбута биллибитэ. Учаастак күрүөлэммэтэх уонна көҥүл киириилээх-тахсыылаах этэ. Бастаан суут иннинэ судаарыстыбаннай уорган бу бөҕү суох оҥорорго ирдэбил ыыппыта, ол эппиэтэ суох хаалбыта.

Министиэристибэ суут нөҥүө сиргэ тахсыбыт хоромньуну 832 812 солкуобайынан быспыта. Сууттанааччы бэрэстэбиитэлэ дьахтар биэнсийэҕэ эрэ олорорун, үп-харчы өттүнэн балаһыанньата ыараханын уонна бөҕү-саҕы бэйэтин баҕатынан хомуйарын ыйан туран, сууманы 80 тыһыынчаҕа диэри кыччатарга көрдөспүтэ.

Суут балаһыанньаны учуоттаан уонна Сир кодексын 42-с ыстатыйатынан салайтаран, сири анаммыт сыалыгар болҕомтолоохтук туһанарга эбэһээтэлистибэлээн, ыстараабы 300 тыһ. солкуобайга диэри намтаппыта. Апелляция ылыллыбата: СӨ Үрдүкү суута бастакы инстанция быһаарыытын бигэргэттэ.

Бастакы инстанция суутун уурааҕын апелляциялаатылар, ол гынан баран, СӨ Үрдүкү суутун гражданскай дьыалаларга судебнай коллегията ону көтүрэргэ, уларытарга туох да төрүөтү булбата. Быһаарыы сокуоннай күүһүгэр киирдэ.