Биэнсийэлээх дьахтартан тэлэбииһэрин уорбуттар

Дьокуускай куорат дьуһуурунай чааһын 1 №-дээх полиция салаатыгар биэнсийэлээх дьахтартан үҥсүү киирбит. Ол курдук, кини кыбартыыратыттан тэлэбииһэрин уорбуттар. Хоромньу уопсай сууммата 13 тыһыынча солкуобайга тэҥнэспит. Көрдөөһүн түмүгүнэн суһал ирдэбил үлэһиттэрэ 28 саастаах эрдэ уорууга тутуллан сууттана сылдьыбыт эдэр киһини туппуттар.

Онно биллибитинэн, эмсэҕэлээччи улуустан кэлбит үлэтэ-хамнаһа суох уорбаланааччыны аһынан быстах кэмҥэ дьиэтигэр олордубут. Аҕыйах хонон баран уорбаланааччы кыбартыыраттан тэлэбииһэри уоран баран сүтэн хаалбыт. Уорбут малын кини атыылаан баран ол харчытын тус наадаларыгар туттубут.

Арассыыйа Федерациятын холуобунай кодексатын 158 ыст 2 ч «Уоруу» диэн холуобунай дьыала тэриллибит.