Биэрэк Үрдүгэр тутуу матырыйаала кэллэ

СӨ Үп министиэристибэтэ сыл аайы олохтоох бэйэ көҕүлээһининэн нэһилиэктэргэ араас тутуулары ыытарга өйөбүл оҥорор. 

Былырыын Тымныы полюһунан биллэр Өймөкөөн нэһилиэгин Биэрэк Үрдүн учаастагын олохтоохторугар баһылык Павел Васильев нэһилиэнньэ өрүү туруорсар кыһалҕатын — киин ититэр тиһиккэ олорор дьиэлэри киллэрэри туруорсарга этии киллэрбитэ. Олохтоох дьаһалта исписэлиистэрэ бэлиэтииллэринэн,  Биэрэк Үрдүгэр  45 ыал чааһынай уонна үс элбэх кыбартыыралаах дьиэлэр,  икки 2 социальнай эбийиэк — уһуйаан уонна Култуура дьиэлэрэ баар. Олохтоохтор сүрүннээн тыа хаһаайыстыбатынан дьарыктаналлар.

Бэйэ көҕүлээһинин ньыматынан быйыл Биэрэк Үрдүн дьиэлэрэ киин ититии тиһигэр холбоноллорун ситиситилэр. Соторутааҕыта учаастакка 1182 м турбаны уонна 104 устуука кырааны тиэйэн аҕаллылар.

Тутуу бу матырыйаалыгар барыта 2 мөлүйүөн 890 солкуобай көрүллүбүт. Онтон 1 мөлүйүөн 810 солкуобайы СӨ Үп министиэристибэтэ үбүлээтэ. 300 тыһ. солкуобайы “Якутское Золото” ХЭУо (сал. Дмитрий Гайман) уйуммут. Олохтоох бүддьүөттэн  633,5 тыһ. солкуобай көрүллүбүт. Нэһилиэнньэ 152,5 тыһ.солкуобайы хомуйбут. Тутуу матырыйаалын Биэрэк Үрдүн  олохтооҕо Александр Винокуров тиэйэн аҕалбыт. Эһиил бу учаастакка “Теплоэнергосервис” АУо саҥа хочуолунайы тутуоҕа.

Онон олохтоохтор бэйэ көҕүлээһинин хамсааһын өйөбүлүнэн кэлиҥҥи сылларга олохторун тупсарар үгүс үлэни былааннаан, нэһилиэктэрин сайыннарыыга үлэлэһэллэр.