Биэс күн устата ураһа таҥаһын тиктилэр (ВИДЕО)

Бэс ыйын 2-6 күннэригэр Кэбээйи улууһун Куокуй нэһилиэгин «Надежда» түмсүү иистэнньэҥнэрэ Кыайыы ыһыаҕын көрсө нэһилиэк түөлбэлэригэр биэс ураһа таҥаһын үтүө санаанан салайтаран тиктилэр.

Ирина Петрова шаблон быспытынан Дмитрий Сметанин уонна Никифор Спиридонов таҥаһы тэлгэтэ сытыаран, бэлиэтээн, быһан, бэлэмнээн истилэр. Быстах быһыыларга Полина Бубякина, Саргылана Спиридонова, Зоя Гуляева көмөлөстүлэр. Сүрүн иистэнньэҥнэр Татьяна Еремеева, Раиса Ноговицына, Рая Игнатьева, Валентина Гуляева, Надежда Илларионова олору тигэн тирилэтэн истилэр. Кинилэргэ эдэр көмөлөһөөччүбүт Сардана Ионова илии-атах буолла. Ыйан-кэрдэн биэрээччибит —  Ирина Петрова.

«Угуйаан» култуура дьиэтигэр (дириэктэр Н.В. Илларионова) биэс күн көхтөөх, көрдөөх үлэ түмүгэр ураһа сүрүн тигиитэ бүттэ. Мөһөөччүгүн тигэннэр, ураһа таҥаһын уган бэлэмнээтилэр.  Биир санаанан улгумнук ылсан иистэммит, көмөлөспүт, үлэлэспит дьоммутугар  «Надеждалар» махтаналлар.

Ираида Софронеева, Кэбээйи, Куокуй.

Хаартыскалар, видео: Ираида Софронеева тиксэриитэ.