«Успуорт – олох нуормата» бырайыагынан аҕыс успуорт саалата тутулунна

Саха сиригэр 2019 сыл тохсунньу 1 күнүгэр Арассыыйа Бэрэсидьиэнэ Владимир Путин көҕүлээһининэн саҕаламмыт «Успуорт – олох нуормата» федеральнай бырайыак ситиһиилээхтик түмүктэннэ.

Бырайыак чэрчитинэн успуорт эбийиэктэрин тутуу, аныгы спортивнай инвентары туруоруу, маассабай успуорт тэрээһиннэри ыытыы, ону тэҥэ эти-сиини чэбдигирдиигэ элбэх үлэ барда диэн СӨ успуорка министиэристибэтэ иһитиннэрэр.

Физкултуура уонна успуорт миниистирэ Леонид Спиридонов бэлиэтээбитинэн, 2024 сыл түмүгүнэн Саха сиригэр 1918 успуорт эбийиэгэ үлэлии турар. 24 тырыбыналаах стадион, 568 сүүрэр сир, 874 успуорт саалата, 53 сөтүөлүүр бассейн, 22 хайыһар баазата, 5 биатлон комплекса, 30 успуорт ытыыга көрүҥүн саалата, 6 оҥоһуу муустаах сабыылаах эбийиэгэ, 18 манеж, 103  рекреационнай инфраструктура уонна 214 атын эбийиэк баар.