Биэс сылга көҥүлэ быһылынна

Ленскэй оройуонун олохтооҕо улахан кээмэйдээх наркотигы сокуону кэһэн туран атыылаабытын иһин 5 сылга көҥүлэ быһылынна.

Ленскэй оройуонун борокуратуурата 2024 сыл муус устар ыйга улахан кээмэйдээх наркотиктары сокуону кэһэн туран атыылаабыт олохтоох киһиэхэ холуобунай дьыала тэриллиитин өйөөтө (РФ ХК 228.1 ыст. 3 ч. “б” п).

Суут мунньаҕар сууттанааччы буруйун билиммэтэх, кини этэринэн, наркотигы киниэхэ билэр киһитэ уурдарыыга диэн биэрбит, онтукатын аҕыйах хонон баран ылбыт.

Судаарыстыбаннай борокуруор аҕалбыт дакаастабылларыгар олоҕуран, сууттанааччы оҥорбут  буруйа толору дакаастанна.

Суут бириигэбэринэн, 5 сылга кытаанах эрэһиимнээх холуонньаҕа ыытар накаастабыл таҕыста.

Маны таһынан, сууттанааччы наркотигы атыылаан ылбыт үбэ-харчыта судаарыстыба туһатыгар былдьанна.

Бириигэбэр сокуоннай күүһүгэр киирэ илик, ааһыныахха сөп, диэн иһитиннэрэр СӨ борокуратууратын пресс-сулууспата.